د سوداګریزو بانکونو له استازو سره د برېښنایي کېدلو په اړه استماعیه غونډه جوړه شوه
۱۴۴۶ ربیع الاول ۹ مه – د افغانستان بانک غواړي چې په مالي او بانکي برخو کې برېښنایي خدمتونو برخې ته پراختیا ورکړي، د دې برخې د پیاوړتیا لپاره کمېټه ټاکل شوې او نن یادې کمېټې د سوداګریزو بانکونو د عملیاتي او معلوماتي ټکنالوژۍ د برخو له آمرینو سره استماعیه غونډه جوړه کړه.
په دې غونډه کې چې مشري یې د افغانستان بانک د ریاست د دفتر لوی آمر ښاغلي فدا محمد فیضان کوله د ډیجیټل خدمتونو پر وړاندې د ننګونو، تخنیکي مسائلو د سنجش او لومړیتوبونو د پېژندلو په اړه بحثونه او د نظرونو تبادله تر سره شوه.
په یاده غونډه کې د افغانستان بانک د ریاست د دفتر لوی آمر وویل، چې د افغانستان بانک په مالي او بانکي برخو کې د برېښنایي برخې پراختیا ته ژمن دی او په همدې موخه یې د دې برخې لپاره ځانګړې کمېټه په دنده ګمارلې ده، ترڅو یاده کمېټه د برېښنایي کېدلو د پراختیا په اړه هر اړخیزې ارزونې وکړي او د هغو په رڼا کې کړنې تر سره کړي.
باید وویل شي چې د افغانستان بانک غواړي، ترڅو په هېواد کې د مالي خدمتونو د پراختیا په موخه د ډیجیټل خدمتونو برخې ته پراختیا ورکړي او له دې لارې د هېواد په ټولو برخو کې مالي خدمتونو ته په آسانه او ارزانه ډول د درنو هېوادوالو لاسرسی زیات کړي.
