د بېرغ د ملي ورځې درناوی، د هېواد د ملي هویت او ارزښتونو درناوی دی
۱۳۹۹ د زمري ۷ ـ د افغانستان بانک د زمري اوومه چې د بېرغ له ملي ورځې سره سمون لري، د روغتیایی تدابیرو په پام کې نیولو سره یوه غونډه جوړه او په اوږدو کې یې ملي بېرغ ورپاوه
د افغانستان بانک د لوی ریاست سرپرست ښاغلي اجمل احمدي د افغانستان بانک د بېلابېلو شعبو د آمرینو په غونډه کې ګدون وکړ او د دې ورځې لمانځنه یې د هېواد د ملي هویت او ارزښتونو درناوی وباله. همدا ډول هغه زیاته کړه چې ملي بېرغ زمونږ د ملي هویت، ویاړ او اقتدار نښه ده او د ملي بېرغ رپاندتیا، د هېوادوالو د ملي ځواک او یووالي په معنی ده.
ښاغلي احمدي د دې پروګرام په پای کې، د بېرغ د ملي ورځې د لمانځنې په مناسبت د هېواد ټول غیور او زړور ملت ته مبارکي وايي او د لوی خدای ج له درباره په هېواد کې د تلپاتې سولې غوښتنه کوي څو ټول ګران هېوادوال د امن په چاپیریال کې د یو بل ترڅنګ ژوند وکړي.
