د ختیځ زون د ولایتي چارواکو لخوا د ملي پیسو (افغانۍ) د لا دودیدو لپاره هڅې
د افغانستان بانک د ختیځ زون آمر ښاغلي احمد زی توحید یار د زون له کارکوونکو څخه د جوړ شوي پلاوي په مشرۍ د ننګرهار ولایت له ولایتي چارواکو او د هغه ولایت د ولایتي شوراګانو له مسؤلینو سره لیدنه وکړه او د داخلي راکړو او ورکړو پر مهال یې د ملي پیسو په تبلیغ او دودیدو او د هغه د ژر زړیدو د مخنیوی په څرنګوالی بحث او خبرې اترې وکړې. دا غونډې چې د روان کال په ۲۹ او ۳۰ نېټو جوړې شوې وې، په پیل کې ښاغلي احمد زی توحید یار د افغانۍ د دودیدو د لړۍ او د هغه د ساتلو د طریقو په اړه خبرې وکړې او د ننګرهار ولایت له چارواکو یې وغوښتل څو اړوندو ادارو ته لارښوونه وکړي چې په دې ملي پروسه کې له د افغانستان بانک سره همکاري وکړي.
ورپسې د ننګرهار ولایت مرستیال ژمنه وکړه چې د ننګرهار ولایت د اداري غونډې په اجنډا کې به پر دې موضوع بحث وکړي او ټولو اړوندو ادارو ته به لارښوونه وکړي څو د افغانۍ د دودیدو په بهیر کې خپل ملي رسالت ترسره کړي.
په ورته وخت کې د ننګرهار ولایت د ولایتي شورا مرستیال وویل چې د افغانیو دودیدل زمونږ ملي مسؤولیت دی او ژمنه یې وکړه چې په دې ملي پروسه کې به له د افغانستان بانک سره له هیڅ ډول همکارۍ دریغ و نه کړي.
