د افغانستان بانک خبرتیا

د هېواد درنو خلکو، په ځانګړې توګه په سوداګریزو بانکونو کې د حساب لرونکو سره مو د خپلو  ژمنو له مخې اوس د پېرودونکو د امانتونو د ورکړې په بهیر کې اسانتیاوو د رامنځته کولو، د هېوادوالو مالي ستونزو ته د رسېدنې او د بانکي نظام د چارو د لاښه والي په موخه  لاندې اسانتیاوې په پام کې نیولې دي چې ټول سوداګریز بانکونه او د بهرنیو بانکونو نماینده ګۍ یې په پلي کولو مکلف دي.

۱-  د امریکایي ډالرو انفرادي حساب لرونکو ته په اونۍ کې د ۶۰۰   امریکایي ډالرو ورکړه، چې له دې وړاندې په اونۍ کې ۴۰۰   امریکایي ډالر وو او که غواړي چې په میاشت کې یوازې یو ځل له خپل حساب څخه پیسې واخلي ۲۰۰۰ امریکایي ډالر اخیستلای شي، له دې وړاندې دا مبلغ ۱۲۰۰ امریکایي ډالر ؤ؛

۲-  د افغانۍ انفرادي حساب لرونکو ته په اونۍ کې ۵۰۰۰۰ افغانۍ، چې له دې وړاندې ۳۰۰۰۰ افغانۍ وې او که وغواړي چې په میاشت کې یو ځل له خپل حساب څخه پیسې واخلي ۲۰۰۰۰۰ افغانۍ اخیستلای شي، له دې وړاندې ۱۰۰۰۰۰ افغانۍ وې؛

۳-  د شرکتي حسابونو لپاره ٪ 5 ټاکل شوی، چې په میاشت کې حد اکثر د 40000  امریکایي ډالرو څخه زیات نه شي، له دې وړاندې حد اکثر 25000  امریکایي ډالر وو.

۴-  په همدې ډول د وړو او متوسطو شرکتونو بانکي ضمانتونه چې د ۳۰۰ زره افغانۍ معادل يا له دې کم وي، اجرا او نغدي تضمين بايد د افغانستان بانک له متحدالمال سره سم د دوی بانکي حساب ته ولېږدول شي.

په ورته وخت کې، هغه درانه پیرودونکي چې خپلې پیسې یې د ۱۲/۰۸/۱۴۰۰ نېټې څخه وروسته په بانکونو کې جمع کړي او یا یې له دې وروسته جمع کوي، هر وخت چې وغواړي په مکمله توګه یې اخیستلای شي او یا یې هم بل حساب ته لېږدولای شي. هغه سوداګریز بانکونه او د بهرنیو بانکونو نمایندګۍ چې سرغړونه وکړي او یا هم له پېرودونکو په دې اړه مستند شکایتونه تر لاسه شي له دوی سره به اصولي چلند وشي.

د خپلو شکایتونو د ثبتولو لپاره مهرباني وکړئ د افغانستان بانک ویب پاڼې ته مراجعه وکړئ او د شکایتونو دریڅه کې خپل شکایت ثبت کړئ او یا هم د info@dab.gov.af او customer.protection@dab.gov.af  برېښنالیکونو له لارې زمونږ سره وصل شئ.

د افغانستان بانک د خپلې ژمنې پر بنسټ هڅه کوي چې په دې برخه کې د خپلو هېوادوالو لپاره نورې اړینې اسانتیاوې رامنځته کړي او د بانکي نظام ټول فعالیتونه عادي حالت ته را وګرځوي، ترڅو پدې وسیله درنو هېوادوالو ته د اغېزناکو خدمتونو تر څنګ د لویو اقتصادي پروژو په تمویل او بیا رغونه کې خپل مثبت رول ولوبوي.