د افغانستان بانک سرپرست رئیس د سوداګریزو بانکونو له رئیسانو سره ولیدل
۱۴۴۶ محرم الحرام ۹ مه – د افغانستان بانک د ټولو سرپرست رئیس ښاغلي نور احمد آغا د سوداګریزو بانکونو له رئیسانو سره ولیدل او د غوره بانکي خدمتونو پر وړاندې کولو یې ورسره خبرې وکړې.
په یاده غونډه کې چې د افغانستان بانک په مرکزی دفتر کې جوړه شوې وه، د افغانستان بانک سرپرست رئیس ښاغلي نور احمد آغا درنو هېوادوالو ته د غوره خدمتونو د وړاندې کولو لپاره د زمینې پر برابرولو، مالي او بانکي ثبات، اسلامي بانکوالۍ د پراختیا، پر بانکي سکتور د اغېزناکې څارنې، د مالي خدمتونو د پراختیا، بهر ته د پیسو د لېږد را لېږد، د اسلامي مالي تمویلاتو او د کوچنیو پورونو د ورکړې لپاره د مناسب بستر په رامنځته کولو، صعب الحصول پورونو په تر لاسه کولو، ظرفیت لوړونې او یو شمېر نورو اړوندو موضوعاتو د سوداګریزو بانکونو له رئیسانو سره هر اړخیزې خبرې وکړې.
ښاغلي نور احمد آغا د سوداګریزو بانکونو له رئیسانو وغوښتل چې د درنو هېوادوالو لپاره د غوره بانکي خدمتونو د وړاندې کولو زمینه برابره کړي، ترڅو درانه هېوادوال وکولای شي په نړیوالو معیارونو له برابرو بانکي خدمتونو برخمن شي.
په دې غونډه کې د سوداګریزو بانکونو رئیسانو هم خپلې ستونزې او وړاندیزونه د افغانستان بانک له سرپرست رئیس سره شریک کړل، ښاغلي نور احمد آغا د افغانستان بانک له اړخه د قوانینو او مقرراتو په رڼا کې د سوداګریزو بانکونو استازو ته د پوره همکارۍ ډاډ ورکړ.
د یادونې وړ ده چې په دې غونډه کې د افغانستان بانک د ریاست د دفتر لوی آمر ښاغلي صدیق الله خالد، د بانکي څارنې لوی آمر ښاغلي شیخ عبدالرحمن قانت، د بانکي څارنې د لوی آمریت مرستیالانو او د سوداګریزو بانکونو رئیسانو ګډون کړی وو.
