آمریتونه

د افغانستان بانک د هېواد د مرکزي بانک په توګه د بیو د ټیکاو، د مالي نظام د ټنګښت او ټیکاو، د اداینو د خوندي سیستم، د اسعاري زېرمو د اغیزناکه کنټرول، د پیسو د چاپ او خپرولو په برخو کې او د پیسو د بانکدار په توګه فعالیت کوي.

د افغانستان بانک د دې کړنو د اغیزناکه ترسره کولو لپاره په خپل تشکیلاتي جوړښت کې بېلابېلې شعبې جوړې کړي، څو د بانک د بنسټیزو دندو په ترسره کولو او د بانک د موخو په ترلاسه کولو سره د اقتصادي ودې ملاتړ وکړي.

د ریاست د دفترعمومی آمریت

د ریاست د دفتر عمومی آمریت، د افغانستان بانک د موخو او دندو په پلي کولو کې یو له مهمو برخو څخه ګڼل کیږي. دا آمریت د بانک له شریکانو سره د اړیکو له لارې، د افغانستان بانک  سیاستونه او پالیسۍ لیږدوي او د بازار لوبغاړي له نوي اقتصادي پیښو او د پړسوب د نرخ، اقتصادي ودې او د مالي نظام د ټیکاو په اړه له وړاندوینو خبروي.

د پولي سیاست لوی آمریت

د افغانستان بانک د پولي سیاست د لوی آمریت مهمه موخه د کورنیو بیو او د ملي پیسو د ارزښت د ساتلو په موخه د هېواد د پولي سیاست او اسعاري سیاست طرح، تر لاس لاندې نیول او اجراء کول دي. د توکو او خدمتونو د بیو پر وړاندې د ملي پیسو د ارزښت د ثبات له تأمنیولو پرته دې موخو ته رسیدل ناشونی ده. 

د مالي چارو د څارنې لوی آمریت

په افغانستان کې د یو سالم او با ثباته مالي سیستم درلودل چیرې چې بانکونه او مالي سیستم له قانون، مقررو، پالیسیو، مناسبو کړنلارو سره سم او د ښې ادارې په توګه دودیزه خدمتونه او د اسلامي بانکدارۍ محصولات  وړاندې کړي او د بانکدارۍ فعالیتونه په سالمه او خوندي توګه ترسره شي او د خلکو امانات خوندي وي.

د بازارعملیات لوی آمریت

د بازار عملیات لوی مدیریت، د افغانستان بانک د قانون له تصویب څخه وروسته د ۲۰۰۳ میلادي کال په وروستیو کې د بازار اقتصاد د نظام په پام کې نیولو سره جوړ شو.

د ټولوناظراداره

د داخلي څېړنې اصلي موخه، د بانک د ټولو شعبو د کاري دندو او مسئولیتونه د ترسره کولو او د اړوندې ادارې د عمومي کړنو له بهیر څخه د ملاتړ په موخه د معتبرو او بې پرې معلوماتو وړاندې کول دي.

د مالي شخړو د حل کمېسیون پیژندنه

د افغانستان بانک د قانون د یو سلو شپږمې مادې د حکم پر بنسټ، د مالي شخړو د حل کمېسیون یو نیمه قضايي اداره ده چې د جوړیدو موخه یې د سوداګریزو بانکونو او د افغانستان بانک او د مخابراتي کمپنیو او د مخابراتي خدماتو د تنظیم د ادارې (اترا) او د هغو ادارو ترمنځ د شخړو وړ قضیو ته چې په تړون لیک کې یې خپلې لانجمنې قضیې دې کمېسیون ته راجع کړي دي، رسیدنه ده. دا کمیسیون د شخړو وړ قضیې له قضائي څېړنو دمخه، په مصلحتي توګه حل او فصل کوي.

د مالي استخباراتو اداره

د افغانستان د مالي معاملو او راپورونو د څېړنې د مرکز مهمه موخه د هغو اشخاصو د ناسمو ګټو اخیستنو مخینوی دی چې خپل عواید د نامشروع کړنو له لارې ترلاسه کوي او همدا ډول د هغو اشخاصو د ناسمې ګټې مخه نیسي چې د تروریزم د تمویل او ملاتړ په برخه کې له دې عوایدو کار اخلي.

د افغان امانتونود بیمې اداره

د وروستي نړیوال مالي کړکېچ تجربه د دې موضوع اهمیت په ډاګه کړ چې باید د امانت اېښودونکو له سپما څخه ساتنه وشي او د تادیاتي سیستم د غوره فعالیت څخه ډاډ ترلاسه شي . احتیاطي مدیریت او څارنه د ډېرو اړینو ابزارونو په توګه په لومړي سر کې واقع کېږي څو د امانت اېښودونکو پیسې خوندي وساتي، په داسې حال کې چې د امانات د بیمې طرح د خوندیتوب په وروستي کتار کې واقع کېږي.

د عامه اعتباراتو د ثبت اداره

د دې ادارې موخه له نړیوالو نورمونو او د بانکدارۍ د پیژندل شویو اصولو سره سم د مطلوبو اعتباري خدمتونو د وړاندې کولو په موخه د معیاري او ستندرد اعتباري معلوماتو له برابرولو څخه عبارت دی، چې د دواړو اړخونو رضایت په سمه توګه ترلاسه کولای وشي.

د مالي او محاسبې لوی آمریت

د مالي او محاسبې لوی آمریت، څرنګه چې له نوم څخه یې معلومیږي، د مالي راپورونو د ترتیبولو، د (عادي او پرمختیايي) بودجې د برابرولو او ترتیبولو، د معاشونو د اجراء کولو، د کارکوونکو لپاره د پور اجراء کولو، د طلباتو او نغدي تادیاتو د اجراء کولو، د ثابتو شتمنیو د ثبتولو او کنټرولولو او د بیلابیلو حسابي معاملو د طی مراحل په شمول د مالي او محاسبې چارې پرمخ وړي.

د معلوماتي تکنالوژۍ لوی آمریت

د مشتري د خدمتونو د مرکز د موډل له لارې کارکوونکو ته د ښو خدمتونو وړاندې کول، په ستراتیژي او الکترونیکي مدیریت په موډل باندې ټینګار، د سیمي د هېوادونو په کچه برابر د ودې د بهیر د ګړندیتوب لپاره د معلوماتي او مکالماتي تکنالوژۍ د مناسب ظرفیت ترڅنګ د افغانستان بانک د عمده کاري اړتیاوو په ملاتړ باندې تمرکز، له ټولو مدیریتونو/ آمریتونو او بهرنیو غړو بانکونو سره ګډې هڅې او همکاري.

د بشري منابع لوی آمریت

د حمایوي، خوندي او د مناسب کاري چاپیریال په پام کې نیولو سره د وړ او مناسبو افرادو د جذب، خوندیتوب، هڅونې، ارتقاء او ودې په موخه د باکیفیته او باکمیته خدمتونو وړاندې کول او د افغانستان بانک ستراتیژیکو اهدافو ته د رسیدو په موخه په متقابلو اجرأتو او چلندونو کې د انساني ارزښتونو تحقق، د دې آمریت عمده موخې جوړوي.

د حقوقي مشاوریت اداره

د افغانستان بانک د حقوقي مشاوریت اداره په ۱۳۸۳ کال کې د افغانستان بانک په اډانه کې جوړه شوی. د تسوید په ګډون د افغانستان بانک د قوانینو او مقررو په اړه د لازمو مشورو او لارښودنو وړاندې کول، د هېواد له نورو نافذه قوانینو سره د افغانستان بانک د تقنیني سندونو همغږي کول یا تعدیلول، د افغانستان بانک حقوقي او تقنیني اړتیاوو ته ځواب ورکول، له دولتي ادارو، نړیوالو سازمانونو سره په غونډو کې ګډون (په هغه صورت کې چې دا غونډې د افغانستان بانک حقوقي موضوعګانې او مسئولیتونه راونغاړي) د دې ادارې مسئولیتونو جوړوي.

د بانکي عملیاتو لوی آمریت

د افغانستان بانک د مرکز او نمایندګیو او د نمایندګیو ترمنځ د دوه اړخیزو  اړیکو تأمینول، دولتي ادارو، تصدیو او د ملي پیوستون پروګرام(NSP)لپاره د چکبکونو اجراء کول، مالیې وزارت او د ولایتونو مستوفیتونو لپاره د کمپیوټري چکونو چاپول او وېشل، اسعارو ته د افغانۍ حوالو اړول او د هغه بر عکس، اړوندو حسابونو ته د دولت د عوایدو راټولول، د ماليې وزارت له موافقې وروسته دولتي ارګانونو لپاره د جاري حسابونو پرانیستل او د ماليې وزارت او نورو ادارو د فرمایشونو له مخې د اسعاري پیسو برابرول.

د تادیاتو لوی آمریت

د تادیاتو لوی مدیریت د سالم، خوندي، اغیزناکه، د ملي اعتماد وړ او له نړیوالو معیارونو سره برابر د ورکړې د سیستم د طرح، جوړولو او پراختیا مسئولیت په غاړه لري

د نړیوال بانک د تمویل پروژو لوی آمریت

د دې پروژې موخه، د بانکي قوانینو او د بانکي څارنې په چارو کې د کاري ظرفیت پیاوړتیا او په مالي سکتور کې د سمونونو لپاره د مالي ادارو د جوړیدو له لارې بانکي رسمي خدمتونو ته لاسرسۍ ده.

د خدماتو لوی مدیریت

د خدماتو لوی مدیریت د افغانستان بانک یو له عملیاتي مدیریتونو څخه دی او د اداري او تعمیراتو په نوم دوه معاونیتونه لري.

د مالي خدمتونوته د عامه لاسرسۍ او پراختیا آمریت

مالي خدمتونو ته لکه بانکې حساب، سپما حساب، د تقاعد حساب بیمه، پور اخیستل ته لاس رسۍ او لازمه تادیاتي وسایلو ته د عامه لپاره آسانه، خوندي، مناسب، اقتصادی، با کیفیت او ځوان نسل( قانونی عمرنه پورته) په ځانګړې ټوګه ټیټ عاید لرونکې خلک او د ټولنې محروم او زیان منونکې طبقه ته دوامداره او آسانه لاس رسۍ برابرول.

د  تدارکاتو آمریت

د تدارکاتو لوی آمریت د افغانستان د اسلامي جمهوریت د عامه تدارکاتو له قانون سره سم د ۱۳۹۳ کال د کب د میاشتې په ۲ نېټه د افغانستان بانک په اډانه کې د یو جلا ډیپارټمنټ په توګه تأسیس شو. د تدارکاتو لوی آمریت د افغانستان بانک د ټولو تدارکاتي او د قراردادونو د اړوندو فعالیتونو د اداره کولو مسئولیت په غاړه لري. د دې آمریت موخه په د افغانستان بانک کې د ټولو تدارکاتي او د قراردادونو د مدیریت د اړوندو فعالیتونو لپاره د اړیکې د یو واحد مرکز جوړول دی.

د  مالي خطرونو آمریت

دا آمریت، هغه خطرونه چې د افغانستان بانک د عملیاتي خطرونو، د بازار خطرونو، د سیالیت او د اسعارو د تبادلې د نرخ خطرونو، د ادارې او مدیریت خطرونو، د تکنالوژۍ خطرونو، د شهرت خطرونو او د داسې نورو خطرونو له پلوه ګواښوي، څېړي او د اغیزناکه تګلارو د څېړلو او ارزولو او د عملي موډلونو او د بازل کمیټې له لوري معرفي شوي معیارونو له تطبیقولو وروسته په هره برخه کې د کاري بهبود لپاره کاروي، څو د افغانستان بانک د مرکزي بانک په توګه د خپلو بنسټیزو او بنیادي دندو چې د بیو ټیکاو، اقتصادي وده، د تادیاتو بیلانس، د پړسوب ټیټوالی، اسعاري سیاست او د داسې نورو په ترسره کولو کې اغیزناکه عمل وکړي.