په کابل کې د ترکیې له سفیر سره د افغانستان بانک د سرپرست لیدنه
۱۴۰۰ د لیندۍ ۲۷ مه – د افغانستان بانک سرپرست رئیس ښاغلي حاجي ادریس په کابل کې د ترکیې له سفیر ښاغلي جهاد ارګین سره ولیدل او پر بېلابېلو مالي او بانکي موضوعګانو یې خبرې وکړې.
په دې لیدنه کې په کابل کې د ترکیې سفیر ښاغلي جهاد ارګین یادونه وکړه چې دغه هېواد په تېره اونۍ کې د افغانستان په بېلابېلو برخو کې درې د بشري مرستو کڅوړې ویشلي دي او دا هېواد به خپلو بشري مرستو ته دوام ورکړي.
نوموړي د افغانستان بانک څخه مننه وکړه چې له ترکي شرکتونو سره یې د بانکي ستونزو د حل په برخه کې مرسته کړې ده.
د افغانستان بانک سرپرست رئیس د ترکیې د هېواد له مرستو د مننې تر څنګ یادونه وکړه چې د افغانستان بانک به اوسني وضعیت ته په کتلو سره هڅه وکړي چې د ترکیې هېواد د بشري مرستو د رسولو لپاره اړینې بانکي آسانتیاوې رامنځته کړي، څو افغانان له فقر او بېوزلۍ څخه وژغورل شي.
