د افغانستان بانک خبرتیا!
درنو هېوادوالو،
د بیو ثبات او د اسعارو مبادلې د نرخ ساتنه د افغانستان بانک له اساسي موخو څخه شمېرل کېږي. خپلو درنو هېوادوالو ته ډاډ ورکوو چې د افغانستان بانک، د تېر په څېر د بیو د ثبات او د افغانۍ د ارزښت د ساتنې لپاره اړین اقدامات ترسره کوي.
په پولي بازارونو کې نوسانونه د نورو هېوادونو په څېر یو طبعي او معمول اقتصادي حالت دی، نو ګرانو هېوادوالو ته اړتیا نشته چې له دې پلوه اندېښنه وکړي.
د افغانستان بانک کافي مالي سرچینې په واک کې لري او د بیو د ثبات، نقدینګۍ، او د پولي بازارونو او مالي بنسټونو د اسعاري اړتیاوو د پوره کولو لپاره اړین اقدامات ترسره کوي.
همدارنګه، د افغانستان بانک د هېواد پولي او مالي بازارونه په دقیقه توګه څاري او که د هر ډول ناوړه ګټې اخیستنې موارد ولیدل شي، په دې اړه به د اړوندو ادارو سره په همغږۍ لازم اقدامات ترسره کړي.
