د افغانستان بانک خبرتیا!
ګرانو هېوادوالو!
د لسو او شلو مندرسو افغاني بانکنوټونو د بدلولو مخکنۍ خبرتیا په تعقیب، لاندې ذکر شوو دریو موضوعاتو ته یو ځل بیا ستاسې پام راګرځوو چې مونږ ورسره د بانکنوټونو د بدلولو په پروسه کې مخ شوي یو.
۱- یو شمېر هېوادوال بانکونو ته د بدلولو لپاره داسې بانکنوټونه راوړي چې د طبیعي پېښو په پایله کې سوزېدلي وي، حال دا چې هغه بانکنوټونه چې اور یې اخیستی وي او یا سوزېدلي وي په دې پروسه کې نه شامليږي او د نورو قانوني پړاوونو څخه تېریږي. بانکونه دې په دې برخه کې د بانکنوټونو د بدلولو له کړنلارې سره سم اجراات وکړي او خلکو ته دې لارښوونه وکړي.
۲- زموږ يو شمېر هېوادوال په قصدي توګه د چلښت وړ هغه بانکنوټونه چې له ځانه سره یې لري د نويو بانکنوټونو د ترلاسه کولو لپاره څیروي او د مندرسو بانکنوټونو په شرایطو یې برابروي، له ملي پیسو سره د دوی دا ډول چلند د قانون خلاف عمل دی. نو له درنو هېوادوالو څخه غوښتل کېږي چې له دې عمل څخه لاس واخلي او بانکونه اړ دي چې مندرس بانکنوټونه له بدلولو څخه مخکې تشخیص کړي او که پدې اړه کوم شواهد تر لاسه کوي ژر تر ژره دې له کشفي او امنیتي ادارو سره موضوع شریکه کړي.
۳- په دې برخه کې یو شمېر کسان غواړي د پيسو د تعویض له پروسې څخه ناوړه ګټه واخلي او بانکنوټونه په پولي توپیر سره بدل کړي چې دا له شرعي پلوه سود او قطعاً حرام عمل دی.
موضوع بانکونو، صرافیو او درنو هېوادوالو ته یو ځل بیا رسول کېږي، تر څو د پورته ټکو په پام کې نیولو سره د بانکنوټونو د بدلولو په برخه کې له پخوانۍ خبرتیا سره سم عمل وکړي او په دې ملي پروسه کې د افغانستان بانک سره همکاري وکړي. بايد يادونه وشي چې له سرغړوونکو سره به قانوني چلند وشي او مجازات به شي.
