د افغانستان بانک سرپرست د صرافانو د یووالي شورا له یو تن غړي سره وکتل
۱۴۰۰ کال د چنګاښ ۱۲ مه – د افغانستان بانک سرپرست ښاغلي اجمل احمدي د صرافانو د یووالي شورا له غړي ښاغلي احمد شاه حکیمي سره د خپل کار په دفتر کې وکتل او د صرافانو او پولي خدمتونو د وړاندې کوونکي د کړنو د میکانیزه کولو په اړه یې ورسره خبرې وکړې.
په پیل کې د صرافانو د یووالي شورا غړي ښاغلي حکیمي د قوانینو او مقرراتو په رڼا کې د صرافانو او پولي خدمتونو د وړاندې کوونکو ستونزو او وړاندیزونو ته د رسېدنې په اړه خبرې وکړې او د افغانستان بانک له مشرتابه څخه یې په دې برخه کې د همکارۍ غوښتنه وکړه.
ورپسې، د افغانستان بانک سرپرست ښاغلي اجمل احمدي خبرې وکړې، ویې ویل چې د افغانستان بانک د صرافیو او پولي خدمتونو د کړنو د معیاري کولو او پیاوړتیا لپاره ژمن دی او تل یې هڅه کړې ده چې د غیربانکي سکتور د ودې لپاره مناسبې او معقولې زمینې برابرې کړي.
