د افغانستان بانک د کاري چارو د ښه والي په اړه غونډه جوړه شوه
کابل، ۱۴۰۰ کال د لړم ۴ مه ـ د افغانستان بانک د دویم مرستیال ښاغلي عبدالقدیر (احمد) په مشرۍ د افغانستان بانک د آمریتونو له آمرینو سره د عالي شورا په دفتر کې اداري غونډه جوړه شوه. د دې غونډې د جوړیدو موخه د افغانستان بانک د کاري چارو او د آمریتونو د کاري چارو له څرنګوالي څخه د راپور ورکونې د سیستم ښه والی او د هغوي ستونزو ته رسیدنه وه.
د غونډې په پیل کې د افغانستان بانک دویم مرستیال د افغانستان بانک د بېلابېلو شعبو د آمرینو ستونزې، وړاندیزونه او اړین نظرونه واوریده.
وروسته د افغانستان بانک دویم مرستیال ښاغلي عبدالقدیر (احمد) د ستونزو د حل په اړه د خبرو په اوږدو کې وویل چې د افغانستان بانک کارکوونکي باید په خپلو کاري چارو کې د لا روڼتیا او ځیرتیا اصل په پام کې ونیسي او خپلې اړوندې کاري چارې په ښه توګه پر مخ بوځي او باید موخه یې خلکو او هېواد ته رېښتینی خدمت وي.
د افغانستان بانک دویم مرستیال د خپلو خبرو په دوام کې زیاته کړه چې د افغانستان بانک د مشر تابه پلاوي او د کارکوونکو ګډې هڅې د هېواد د مالي او بانکي نظام د تیکاو ساتلو په موخه دي او په دې برخه کې به له هیڅ ډول هلو ځلو څخه درېغ ونکړو.
په پای کې د افغانستان بانک دویم مرستیال د افغانستان بانک د آمریتونو د ستونزو د حلولو لپاره د شعبو آمریتونو ته د هر ډول همکارۍ ژمنه ورکړه او د دې غونډې د ارزښتناکه بللو ترڅنګ یې لارښوونه وکړه څو د کاري چارو د ښه والي لپاره باید دا ډول غونډې دوام ولري.
