د ازبکستان د مرکزي بانک له چارواکو سره انلاین غونډه جوړه شوه
۱۳۹۹ د مرغومي ۲۷- د افغانستان بانک سرپرست ښاغلي اجمل احمدي د ازبکستان د مرکزي بانک له لوړ پوړو چارواکو سره انلاین غونډه ترسره کړه.
دا غونډه چې له نړیوالو او سیمه ایزو ادارو او مالي مؤسسو سره د اړیکو د پیاوړتیا او تنظیم او همدا راز د معقولو مالي او پولي پالیسیو د طرحه کولو او جوړولو لپاره د معلوماتو د شریکولو په موخه جوړه شوې وه، په لړ کې یې د تخنیکي همکاریو، معلوماتو او تجربو پر شریکولو بحث او خبرې اترې وشوې.
ښاغلي اجمل احمدي په اړوندو اقتصادي، سوداګریزو او د پانګونې په برخو کې د دوست هېواد ازبکستان له همکاریو د مننې او ستاینې ترڅنګ د یاد هېواد د مرکزي بانک له چارواکو وغوښتل څو د سالمو بانکي اړیکو په رامنځته کولو کې له د افغانستان بانک سره همکاري وکړي.
د ازبکستان مرکزي بانک له د افغانستان بانک سره د هر ډول تخنیکي همکارۍ، معلوماتو او تجربو د شریکولو ژمنه وکړه او د دواړو هېوادونو د مرکزي بانکونو ترمنځ د اړیکو پر دوام یې ټینګار وکړ.
باید یادونه وکړو چې په دې غونډه کې د ازبکستان د مرکزي بانک مرستیالانو بابر ابوبکروف او بهزاد خمروف ګډون کړی وو.
