د ملي پروژو د تطبیق لپاره د غوره بانکي خدمتونو پر برابرولو د افغانستان بانک د سرپرست ټینګار
۱۴۴۵ جمادي الاول ۵ مه – د افغانستان بانک سرپرست رئیس ښاغلي هدایت الله بدري د سالنګ تونل د رغونې له چارو لیدنه وکړه او د ملي پروژو په تطبیق کې یې د لازمو بانکي آسانتیاوو د رامنځته کولو ژمنه وکړه.
د افغانستان بانک سرپرست رئیس په هېواد کې د دې ډول لویو او ملي پروژو پر پلي کولو خوښي وښوده او یادونه یې وکړه چې په هېواد کې د نظام تر بدلون وروسته ډېر شمېر ملي پروژې پیل شوې دي او په دولتي چوکاټ کې ټولې ادارې په خپلو اړوندو برخو کې د دې ډول پروژو د تطبیق لپاره په پوره ژمنتیا کار کوي.
د یادونې وړ ده چې د افغانستان بانک د هېواد د مرکزي بانک په توګه ژمن دی چې د درنو هېوادوالو لپاره په ټولو مالي او بانکي برخو کې د غوره خدمتونو د وړاندې کولو زمینه برابره کړي.
