په لویدیځ زون کې د عامه اعتبارونو د ثبت ورکشاپ جوړ شو
هرات، ۱۳۹۸ د غويي ۳ مه ـ د افغانستان بانک د عامه اعتبارونو د ثبت لوی آمریت لخوا د نړیوال بانک په مالي مرسته، خصوصي متشبثینو، ښځینه سوداګرو، کسبګرو او صنعت کارانو لپاره په هرات ښار کې د منقولو اموالو د رهن له لارې مالي پیسو ته د لاسرسۍ په اړه د عامه پوهاوۍ یو ورځنی ورکشاپ په لاره واچول شو.
د دې ورکشاپ په پیل کې د افغانستان بانک د لویدیځ زون آمر ښاغلي انور شاه یوسفي په خپلو خبرو کې وویل چې د افغانستان بانک له نړیوالو معیارونو سره سم د منقولو اموالو د رهن د قانون د حکمونو او د رهني حقونو د خبرتیاوو د ثبت د مقررې په رڼا کې د رهن د حقونو د ثبت نوی او برېښنايي سیستم جوړ کړی دی، څو زمونږ هېوادوال په ارامه توګه د منقولو او غیر منقولو اموالو پر وړاندې په اسانه شرایطو سره پور ترلاسه کړي.
ورپسې د عامه اعتبارونو د ثبت د لوی آمریت مرستیال ښاغلي محمد ناصر سهاک د موضوع په اړه خبرې وکړې او یو پرزینټیشن چې د یاد سیستم د بشپړه پیژندنه یې رانغاړله، د ورکشاپ ګډونوالو ته وړاندې کړ.
د یادونې وړ ده چې په دې ورکشاپ کې د عزيزي بانک استازي او د فینکا مالي مؤسسې استازي هم ګډون کړی ؤ چې په خپلو مؤسسو کې یې د پور ورکونې د پالیسۍ او تګلارې په رڼا کې معلومات وړاندې کړل.
