د کابل او میدان وردګو د صرافیو او پولي خدمتونو د شرکتونو مسئولینو لپاره ښوونیز پروګرام جوړ شو
د افغانستان بانک د صرافیو او پولي خدمتونو د وړاندې کوونکو شرکتونو د کړنو د ښه والي په موخه د یادو شرکتونو د عملیاتي او قوانینو او مقرراتو د رعایتولو برخو ۷۰۰ تنو کارکوونکو ته ښوونیز پروګرام جوړ کړ. دا پروګرام په ۱۴۰۲/۰۸/۰۷ نېټه د افغانستان بانک په مرکزي دفتر کې پیل او په ۱۴۰۲/۰۸/۱۵ نېټه پای ته ورسېد چې د کابل ښار او میدان وردګو ولایت د صرافیو او پولي خدمتونو د شرکتونو ۳۵۰ تنو کارکوونکو پکې ګډون کړی وو.
یاد پروګرام په دوو برخو کې جوړ شوی وو چې په لومړۍ برخه کې یې د پیسو وینځلو او له جرمونو څخه د ترلاسه شوو عوایدو پر وړاندې د مبارزې د قوانینو او مقرراتو د رعایتولو، د پېردودونکو د پېژندنې او د هغوی د هویت تثبیتولو، د لویو او شکمنو نغدي معاملو د راپور ورکونې د څرنګوالي، د بندیزونو د لیست د پلي کولو د څرنګوالي، د پېرودونکو پر معاملو د څارنې او خطرونو د ارزونې او د هېواد په اقتصاد کې د پیسو وینځلو او له جرمونو څخه د ترلاسه شوو عوایدو د خطرونو او پایلو په تړاو معلومات وړاندې شول.
د دې پروګرام په دویمه برخه کې د صرافیو او پولي خدمتونو د شرکتونو د ونډه لرونکو، د نظار پلاوي او عامل پلاوي (عملیاتي مسئولینو)، د مالي صورت حسابونو (بیلانس شیټ او د ګټې او زیان صورت حسابونو) د ترتیبولو د څرنګوالي، د شرکتونو د شتمنیو، پوراینو او پانګې د ثبتولو د څرنګوالي، د معاملو د ثبتولو لپاره د سیستم کارولو او د یو هراړخیزه سیستم د معیارونو او د پرمخ بېولو ترڅنګ د یادو شرکتونو د مدیریت او اداره کولو په تړاو د دې ښوونیز پروګرام ګدونوالو ته بشپړ معلومات وړاندې شول.
د یادونې وړ ده چې د پورته مواردو سربېره، د جواز له ترلاسه کولو څخه وروسته د اقداماتو چې د فعالیت جواز د تمدید، ځنډولو، فسخه کولو او انحلال (د دندې پرېښودلو) او د صرافیو او پولي خدمتونو د شرکتونو د تضمینونو او مقرراتي پانګې په تړاو معلومات رانغاړي، په اړه هم لارښوونې وشوې.
د افغانستان بانک ژمن دی ترڅو د صرافیو او پولي خدمتونو شرکتونو لپاره د مناسب او معیاري چاپیریال رامنځته کولو ته لاره هواره کړي او د هېواد د مالي او بانکي سکتور د قوانینو او مقرراتو په اډاڼه کې مالي خدمتونو ته د خلکو د لاسرسي په موخه لا زیاتې هلې ځلې وکړي.
