له زونونو او د هغو تر اثر لاندې نمایندګیو څخه د افغانستان بانک د سرپرست رئیس لیدنه
۱۴۰۰ کب ۲۳ مه – د افغانستان بانک سرپرست رئیس ښاغلي حاجي ادریس او ورسره پلاوي ولایتونو ته د خپل سفر پر دوام نن شمال زون ته سفر وکړ او د دې زون له چارو یې څارنه وکړه. د دې سفر او لیدنو موخه د سمونونو رامنځته کول، د چارو تنظیم، په کړنو کې همغږي، اغېزناک مدیریت، د بانک بنسټیزو موخو ته د رسېدو لپاره ګروپي کار او خلکو ته د غوره خدمتونو وړاندې کول دي.
باید وویل شي چې د افغانستان بانک سرپرست رئیس ښاغلي حاجي ادريس او ور سره پلاوي له شمال زون څخه لیدنه او څارنه وکړه او په دغه زون کې یې د مزار شریف، سرپل، جوزجان، فاریاب، سمنګان، آقینې او حیرتان بندر له مدیرانو سره غونډه جوړه کړه.
په یاده غونډه کې د افغانستان بانک سرپرست رئیس د یاد زون د کارکوونکو د کړنو ګزارشونه، ستونزې او مشکلات واورېدل او د چارو د ښه والي او ستونزو د حل په موخه یې اړوندو مراجعو ته اړینې سپارښتنې وکړې.
په هغه غونډه کې چې په شمال زون کې جوړه شوې وه، د افغانستان بانک سرپرست د دې زون له کارکوونکو وغوښتل چې د درنو هیوادوالو لپاره په پوره اخلاص، رېښتنولی او مسئولیت سره خدمت وکړي. د دې زون کارکوونکو هم ژمنه وکړه چې تر بل هر وخت ډېر به د درنو هیوادوالو لپاره خدمتونه وړاندې کوي او له هېڅ ډول هلو ځلو به درېغ و نه کړي.
باید وویل شي د افغانستان بانک سرپرست له شمال زون څخه تر لیدنې وروسته د یاد زون له نمایندګیو څخه د لیدنې په موخه سفر پیل کړ، څو له نږدې د نمایندګیو له چارو څارنه وکړي، پرمختګونه، لاسته راوړنې او ستونزې یې له نږدې ووینې او حل لارې ورته پیدا کړي.
