د نړیوال بانک وروستی راپور په هېواد کې د پولي سیاستونو د بریالي تطبیق پخلی کوي
د افغانستان بانک په افغانستان کې د پولي وضعیت د ښه والي او د معقولو مالي سیاستونو د تطبیق په اړه د نړیوال بانک د وروستي راپور هرکلی کوي. د داسې راپورونو خپرول چې طبعاً د مسلکي ارزونو او تحلیلونو پر بنسټ جوړېږي، څرګندوي چې افغانستان ښه طرف ته روان دی او د هېواد اقتصادي مسایل په ښه توګه مدیریت شوي دي.
د افغانستان په اړه د نړیوال بانک د ۲۰۲۳ میلادي کال د لومړۍ ربعې په تازه راپور کې راغلي چې افغانستان کې انفلاسیون را کم شوی، افغانۍ د بهرنیو اسعارو پر وړاندې پیاوړې شوې، ټولو دولتي مامورینو ته په وخت معاش ورکول کیږي او عواید د پخوا په پرتله لوړ شوي دي.
د دې راپور له مخې په صادراتو کې د تېر کال د لومړۍ ربعې په پرتله ۷سلنه زیاتوالی راغلی دی.
د افغانستان بانک مشرتابه ژمن دی چې د اړوندو قوانینو او مقرراتو په رڼا کې د درنو هېوادوالو لپاره په ټولو مالي او بانکي برخو کې غوره آسانتیاوې رامنځته کړي او له دې لارې د هېواد په اقتصادي رغښت کې خپل مثبت رول ولوبوي.
