د نړیوال بانک له پلاوي سره غونډه جوړه شوه
کابل، د ۱۳۹۸ کال د زمري ۱۵ مه – د افغانستان بانک د سرپرست او لومړي مرستیال ښاغلي واحدالله نوشیر په مشرۍ د نړیوال بانک له پلاوي سره غونډه جوړه شوه.
په دغه غونډه کې چې د افغانستان بانک د یو شمېر آمریتونو آمرینو هم ګډون کړی وو، د نړیوال بانک استازو ته د دې بانک په اډانه کې د مالي سکتور د چټک ځواب ویلو پروژې(FSRRP) د بشپړېدو او په افغانستان کې مالي خدمتونو ته د لاسرسي د پراختیا(SAFI) پروژې په اړه معلومات ورکړل شول.
د افغانستان بانک سرپرست او لومړي مرستیال ښاغلي واحدالله نوشیر د افغانستان بانک په اډانه کې د دې پروژو پلي کول د خورا ارزښت وړ یاد کړل او په دې برخه کې یې د نړیوال بانک د لا زیاتو همکاریو غوښتنه وکړه.
د نړیوال بانک پلاوي هم د افغانستان بانک سره د خپلو همکاریو ډاډ ورکړ او ژمنه یې وکړه چې په ذکر شوو برخو کې به افغانستان بانک سره خپلو همکاریو ته دوام ورکړي.
د یادونې وړ ده چې د افغانستان بانک په اډانه کې د مالي سکتور د چټک ځواب ویلو پروژه (FSRRP) په ۲۰۱۱ میلادي کال کې پیل شوې وه او د روان میلادي کال تر وروستیو به دوام وکړي او په افغانستان کې مالي خدمتونو ته د لاسرسي د پراختیا پروژه (SAFI) به په ۲۰۲۰ میلادي کال کې پیل شي.
پاتې د نه وي چې په دې غونډه کې د افغانستان بانک د مالي او بانکي چارو مشاور ( سلاکار) ښاغلي سید عبدالغفور سادات، د مالي ټينګښت آمریت آمر ښاغلي سمیع الله مهال، د افغانستان د مالي معاملاتو او راپورونو د تحلیل د مرکز آمر ښاغلي نثار احمد یوسفزي او د اسلامي بانکدارۍ د آمریت آمر ښاغلي ډاکتر یوسف سلیم هم ګډون کړی وو.
