د افغانستان امریکايي پوهنتون د اقتصاد محصلینو لپاره روزنیز ورکشاپ
کابل، ۱۳۹۸ د لړم ۲۷، د افغانستان بانک د هېواد د پوهنتونونو د اقتصاد مالي او بانکي څانګو محصلینو لپاره د روزنیزو پروګرامونو په لړ کې، دا ځل د افغانستان امریکايي پوهنتون محصلینو ته د بانک د دندو، موخو او سیاستونو په اړه روزنیز ورکشاپ جوړ کړ.
په پیل کې د افغانستان د امریکايي پوهنتون رئیس ښاغلي ډیویډ سدني د افغانستان بانک پلاوي ته د ښه راغلاست ترڅنګ د دې ډول ورکشاپونو په ارزښت باندې خبرې وکړې او محصلینو ته یې د دا ډول اغیزناکه پروګرامونو د جوړیدو لپاره له د افغانستان بانک څخه مننه وکړه.
نوموړي د بیو د ټیکاو، د اسعارو پر وړاندې د افغانۍ د نرخ او د هېواد د مالي نظام د ټینګښت په برخو کې د افغانستان بانک هڅې وستایلې او زیاته یې کړه چې د افغانستان بانک د څو کلونو په اوږدو کې له ډېرو ننګونو سره بیاه هم ډېرې لاسته راوړنې درلودلي دي.
ورپسې، د افغانستان بانک سرپرست او لومړي مرستیال ښاغلي واحد الله نوشېر د خپلو خبرو په ترڅ کې وویل چې د دا ډول ورکشاپونه د هېواد له پوهنتونو سره د بانک د اکادمیکو همکاریو برخه ده چې محصلین په دې ورکشاپونو کې په خپل ګډون سره د پولي سیاست د تطبیق، د مالي نظام د څارنې او د مرکزي بانک د اړوندو دندو پر وړاندې د افغانستان بانک د اجرااتو په اړه پوهاوی ترلاسه کوي.
ښاغلي نوشېر د خپلو خبرو په بله برخه کې بانکي خدمتونو ته د خلکو د لاسرسي د اسانتیا لپاره د افغانستان بانک په هڅو باندې د خبرو ترڅنګ وویل چې د افغانستان بانک مالي او بانکي خدمتونو ته خلکو د لاسرسي د اسانتیا په برخه کې اړوند قوانین کتلي او اړین تعدیلات یې په ځانګړې توګه د بانکي تضمینونو په برخه کې رامنځته کړي دي چې پورونو او د بانکي نظام نورو خدمتونو ته د خلکو د لاسرسي زمینه برابره کړي.
د ورکشاپ په اوږدو کې د افغانستان بانک د پولي سیاست لوی آمر ښاغلي نایب خان جمال د یو پریزنټیشن له لارې د پولي سیاست د طرحې او تطبیق په برخه کې د خبرو ترڅنګ د هېواد او سیمې د اقتصادي وضعیت د شننې پر څرنګوالي، د انفلاسیون پر اټکلونو، د داخلي ناخالصه تولیداتو د ودې پر سنجش، د اداینو بیلانس او د پولي سیاست د لوی آمریت د نورو اړوندو دوندو په اړه معلومات وړاندې کړل.
ښاغلي جمال خپلې خبرې په هېواد کې د پولي سیاست پر وړاندې د یو شمېر ننګونو پر څرګندونو پای ته ورسولې.
ورپسې د ا فغانستان بانک د مالي چارو د څارنې د لوی آمریت مرستیال ښاغلي سید محسن سادات د مالي چارو د څارنې د موخو او دندو په اړه د خبرو ترڅنګ د مالي ټیکاو په برخه کې د ورکشاپ له ګډون کوونکو سره هر اړخیز معلومات شریک کړل.
ښاغلي سادات د افغانستان بانک د قانون جوړونې او څارنې د رول برخه هم روښانه کړه او د بانکونو د څارنې طریقه یې د ښه بانک او بد بانک په ډلبندۍ سره واضح کړه.
دا ورکشاپ د داسې اغیزناکو پروګرامونو د جوړولو پر بنسټ د افغانستان بانک د لوح تقدیر په ورکولو او ګډونوالو ته د تصدیق لیکونو په وېشلو پای ته ورسیده.
