د افغانۍ د ثبات په اړه د افغانستان بانک هڅې
د افغانستان بانک د مبادلې د نرخ له متحول مدیریت شوي رژیم څخه ګټه اخلي، چې په دې ډول رژیم کې د مبادلې په نرخ کې د نوسانونو رامنځته کېدل یو حتمي امر دی، لکه څرنګه چې د سیمې یو شمېر هېوادونه یې شاهدان دي.
په دې وروستیو کې د امریکایي ډالرو پر وړاندې د افغانیو د ارزښت د ټیټېدو په اړه باید وویل شي چې د امریکایي ډالر ارزښت یوازې د افغانۍ پر وړاندې ندی لوړ شوی، بلکې د نړۍ د نورو اسعارو پر وړاندې هم د ډالر په ارزښت کې لوړوالی راغلی دی.
همدارنګه بل لامل یې هم داخلي دی چې زیات شمېر هېوادوال د ډالرو د اخیستلو لپاره بازار ته مراجعه کوي.
د افغانستان بانک درنو هېوادوالو ته ډاډ ورکوي چې د افغانیو د ارزښت د ټیټیدو په اړه دې اندېښنه نه کوي او له دوی څخه غواړي چې د افغانۍ د ارزښت د ثبات د ساتنې لپاره د په خپلو معاملو کې له افغانۍ ګټه پورته کړي.
د افغانستان بانک د شته امکاناتو په پام کې نیولو سره تل هڅه کړې ده چې د هغو نوسانونو څخه چې د خلکو د زیانمن کېدو لامل کېږي د امکان تر حده مخنیوی وکړي.
د افغانستان بانک ژمن دی چې په لاس کې شته ابزارونو څخه ګټه پورته کړي او د امکان تر حده د بازار غوښتنې پوره کړي.
