د افغانستان بانک د شرعي نظارتي بورډ غونډه جوړه شوه
د ۱۴۴۴ د شوال ۱۴ مه - د افغانستان بانک عالي شورا په تالار کې د شرعي نظارتي بورډ د ۱۴۰۲ کال لومړۍ غونډه جوړه شوه.
دا غونډه د افغانستان بانک لومړي مرستیال ښاغلي نور احمد آغا په مشرۍ او د شرعي نظارتي بورډ غړو په ګډون ترسره شوه. په دې غونډه کې د افغانستان بانک د شرعي نظارتي بورډ کړنو او د اسلامي بانکوالۍ د ستونزو او حل لارو په اړه مفصلې خبرې وشوې.
د غونډې په پیل کې د افغانستان بانک لومړي مرستیال ښاغلي نور احمد آغا د شرعي نظارتي بورډ غړو څخه مننه وکړه چې د ا.ا.ا د قدر وړ اقتصادي کمیسیون د پریکړې پراساس یې د ټولو بانکونو د اسلامي تمویلاتو محصولات مرور او تصویب کړل او زیاته یې کړه چې متعارف بانکونه په اسلامی بانکونو بدلول د ا.ا.ا د لومړيتوبونو څخه دي او الحمد لله، په هېواد کې اسلامي بانکداري د پراختیا او ودې په حال کې ده.
همدارنګه ښاغلي نور احمد آغا د شرعي بورډ د اجراآتو په برخه کې وویل چې د مالیي وزارت سره په ګډه د صکوکو د قانون مسوده نهایي شوې ده او له شرعي پلوه د افغانستان بانک د مقرراتو او د نورو بانکونو د پالیسیو او محصولاتو ارزونه روانه ده. همدا ډول، د شرعي نظارت بورډ څخه وغوښتل شول د زیات کاري حجم په پام کې نیولو له امله د دې بورډ غونډې هره میاشت ترسره کړي ترڅو د اسلامي بانکوالۍ اړوند موضوعاتو ته ډیره توجه وشي. د یادونه وړ ده چې مخکې له دې یاد بورډ په کال کې څلور غونډې جوړولې.
همدا راز، د افغانستان بانک لومړي مرستیال ښاغلي نور احمد آغا زیری ورکړ چې إن شاء الله په راتلونکې هفته کې به د افغانستان بانک یو هیئت د بحرین په هېواد کې د اسلامی مالی مؤسساتو لپاره د محاسبی او تفتیش نړیوالې مؤسسې (ایوفي) سره یوه تفاهمنامه لاسلیک او د یادې مؤسسې غړیتوب ترلاسه کړي. چې له دې لارې به په هیواد کې اسلامي بانکولي لا پیاوړې او د یادې نړیوالې مؤسسې له معیارونو، مالي محصولاتو او روزنیزو پروګرامونو څخه به ګټه واخیستل شي.
د یادونې وړ ده چې د افغانستان بانک د هېواد د مرکزي بانک په توګه تل هڅه کړې ده چې د درنو هېوادوالو لپاره په مالي او بانکي برخو کې اړینې اسانتیاوې رامنځته کړي.
