د افغانستان بانک مشرتابه پلاوی د تکړه،مسلکي او تجربه لرونکو کارکوونکو درناوی کوي
د افغانستان بانک مشرتابه پلاوي په دې وروستیو کې خپل یو شمیر پخواني او تجربه لرونکي کارکوونکي چې لوړې زده کړې او کافي تجربه لري د دې بانک لوړو او کلیدي بستونو ته ورپېژندلي دي.
د افغانستان بانک مشرتابه پلاوی پر دې باور دی چې د تجربه لرونکو او مسلکي ظرفیتونو لرونکو کارکوونکو ارتقا او ګمارنه کولای شي په ورځنيو کاري فعالیتونو کې اغېزناکتیا رامنځته کړي او د نورو همکارانو لپاره د کار ښه انګیزه رامنځته کړي.
ښاغلی عبدالرحمن بهروز د دغه بانک یو له تکړه او با استعداده ځوانانو څخه دی چې په دې وروستیو کې د خدمتونو د عمومي آمر په توګه ټاکل شوی چې په لاندې ډول یې درپېژنو:
ښاغلي عبدالرحمن بهروز په ۱۳۸۷ لمریز کال کې د کابل پوهنتون د اقتصاد له پوهنځي څخه د لیسانس سند ترلاسه کړی او له ۱۳۸۸ لمریز کال راهیسې د افغانستان بانک کې په بېلابېلو مدیریتي او د آمریتونو د مرستیالیت په بستونو کې دندې ترسره کړې دي.
د افغانستان بانک مشرتابه پلاوي د ښاغلي بهروز د استعداد، تجربې او مسلکي ظرفیت په پام کې نیولو سره په دې وروستیو کې نوموړی د خدمتونو د عمومي آمر په توګه معرفي کړی دی.
د افغانستان بانک مشرتابه پلاوی د بهروز د کارونو د ستاینې تر څنګ نوموړي ته د لوی خدای ج له دربار څخه د هیواد دردمندو خلکو ته د خدمت په لاره کې د لا بریالیتوب دعا کوي.
