د رڼاپوهنتون د اقتصاد پوهنځي محصلینو ته ښوونیز ورکشاپ جوړ شو
کابل، د ۱۳۹۸ کال د لیندۍ ۱۷ مه– د افغانستان بانک له لوري د رڼا د پوهنتون محصلینو ته د دغه بانک د موخو، دندو او ټولیزو سیاستونو په اړه د پوهاوي لپاره یو ورځنی ښوونیز ورکشاپ جوړ شو.
د دې ښوونیز ورکشاپ په پیل کې د افغانستان بانک د ریاست د دفتر د لوی آمریت مرستیال ښاغلي شفیق الله بارز خبرې وکړې او د اقتصاد، مالي او بانکي چارو د برخې محصلینو ته د بانک د موخو، دندو او ټولیزو سیاستونو په اړه د ښوونیزو ورکشاپونو جوړول یې له پوهنتونونو سره د افغانستان بانک د اکاډمیکو همکاریو یوه برخه وبلله چې د افغانستان بانک له لوري د محصلینو د ظرفیتونو د لوړولو لپاره په پام کې نیول شوي دي.
د ښاغلي بارز په خبره د افغانستان بانک پر خپلو بنسټیزو دندو سربېره د اطلاع رسونې، عامه پوهاوي او معلوماتو د شریکولو په برخه کې لازمو هڅو او همکاریو ته ژمن دی.
ورپسې د رڼا پوهنتون رئیس ښاغلي رحیم الله امین خبرې وکړې او یاد پوهنتون ته د افغانستان بانک داړوند پلاوي ته د ښه راغلاست ویلو تر څنګیې د دغه ډول ښوونیزو ورکشاپونو او د اطلاع رسونې په برخه کې د هېواد د مرکزي بانک په توګه د افغانستان بانک له لوري د معلوماتو د شریکولو په ارزښت او د دغه بانک د ټولیزو سیاستونوپه اړه محصلینو ته توضیحات وړاندې کړل.
نوموړي د محصلینو لپاره د دغه ډول ورکشاپونو جوړول د دوی د علمي کچې په لوړولو کې د ارزښت وړیاد کړل او هیله یې وښوده چې دا ډول نور ورکشاپونه به هم جوړ شي.
وروسته بیا د افغانستان بانک د پولي سیاست د عمومي آمریت مرستیال ښاغلي احمد جواد سداد په هېواد کې د پولي سیاست د تطبیق، په کور د ننه د بیو د ثبات د تامین او ساتنې او دغه راز د هېواد اقتصادي وضعیت ته په کتو سره د پیسو د وړاندې کولو په مدیریت، کنټرول او همدارنګه د مبادلې د نرخ په اړه هر اړخیز معلومات وړاندې کړل.
د دې ښوونیز ورکشاپ په بله برخه کې د افغانستان بانک د مالي چارو د عمومي آمریت د داخلي څار مدیر ښاغلي حسیب الله بهنورد پر بانکونو او مالي موسسو د څارنې یو پریزنټیشن وړاندې کړ چې په بانکونو کې د درجه بندۍ په تړاو یې د پانګو د کفایت، دشتمنیو د کیفیت، د ګټې د مدیریت او سیالیت په اړه ګډون کوونکو ته معلومات ورکړل.
د ورکشاپ په وروستۍ برخه کې د ګډونوالو پوښتنو ته ځوابونه وویل شول او دوی ته د دې ښوونیزې دورې تصدیق پاڼې ووېشل شوې.
