مالیزیا هېواد ته د اسلامي اقتصاد او مالي چارو نړیوال فورم کې د ګډون په موخه د افغانستان بانک د لوړ رتبه پلاوي سفر
1445 ذوالقعدة الحرام 16 مه - د افغانستان بانک یو لوړ رتبه پلاوي د مالیزیا د مرکزي بانک په بلنه د اسلامي اقتصاد او مالي چارو نړیوال فورم په نړیوال کلني کنفرانس کې د ګډون لپاره دې هېواد ته سفر وکړ.
دغه پلاوی به د دې سفر په لومړۍ ورځ د مالیزیا د مرکزي بانک له خوا په جوړه شوې غونډه کې ګډون وکړي. یادې غونډې ته د افغانستان بانک او نورو اسلامې هېوادونو د مرکزي بانکونو استازي بلل شوي دي، ترڅو د اسلامې بانکوالۍ د پراختیا په اړه له یو بل سره نظرونه او تجربې شرېکې کړي او اړینې پرېکړې وکړي.
په دویمه او درېیمه ورځ به د افغانستان بانک پلاوی د مالیزیا د دولت له خوا د اسلامي اقتصاد او مالي چارو نړیوال فورم په جوړېدونکي نړیوال دوه ورځني کنفرانس کې ګډون وکړي.
د یادونې وړ ده چې دې کنفرانس ته د نړۍ د بېلابېلو هېوادونو څخه د مرکزي او نورو اسلامي بانکونو او مالي مؤسساتو استازي را غوښتل شوي دي چې په ترڅ کې به یې ګډونوال د اسلامي بانکوالۍ د پراختیا, کوچنیو او منځنیو تشبثاتو په پیاوړتیا او د صکوکو او مالي بازارونو د پراختیا اړوندو مسایلو په اړه بحثونه او ګټورې مشورې وکړي.
له دې سربیره به یاد پلاوی د اسلامي بانکوالۍ اړوند د نړیوال شرعي څېړنیز مرکز، د اسلامي بانکوالۍ او تمویل د نړیوال پوهنتون، د مالیزیا د نړیوال اسلامي پوهنتون او د زکات او حج له ادارو سره د اړیکو د ټينګولو په موخه لېدنې کتنې تر سره کړي.
باید وویل شي چې د افغانستان بانک په ټول هېواد کې د یو سوچه اسلامي او پر شرعي اساساتو ولاړې اسلامي بانکوالۍ د پراختیا لپاره هلي ځلي کوي, ترڅو له سود څخه پاک بانکي نظام رامنځته شي. د افغانستان بانک غواړي له ټولې نړۍ په ځانګړې توګه اسلامي هېوادونو سره متقابلي بانکي اړیکي ولري.
