د افغانستان بانک د لومړي مرستیال په مشرۍ د مالي خدمتونو د پراختیا په موخه د غونډې جوړېدل
۱۴۴۶ د ربیع الاول ۷ مه – د افغانستان بانک د لومړي مرستیال ښاغلي صدیق الله خالد په مشرۍ د مالي خدمتونو د پراختیا په موخه د سوداګریزو بانکونو د ټولنې او د سوداګریزو بانکونو له رئیسانو سره غونډه جوړه شوه.
په دې غونډه کې د افغانستان بانک لومړي مرستیال یادونه وکړه چې د افغانستان بانک غواړي، ترڅو هېوادوال آسانه، ارزانه او رسمي مالي خدمتونو ته لاسرسی ولري، د نوموړي په خبره نننۍ غونډه د همدې موخې لپاره جوړه شوې ده، ترڅو د اړوندو مسائلو په اړه ګډ بحث او د نظرونو تبادله په کې تر سره شي.
په یاده غونډه کې پېرودونکو ته د اسلامي مالي تمویلاتو د برابرولو پر څرنګوالي، په محاکمو کې د خصوصي بانکونو ستونزو ته د حل لارو پر موندلو، پېرودونکو ته د معیاري خدمتونو پر وړاندې کولو، نړیوالو لېږدونو (TT) کې د آسانتیاوو رامنځته کولو او یو شمېر نورو اړوندو موضوعاتو په اړه د نظرونو تبادله تر سره او مفصلې خبرې وشوې.
باید وویل شي چې په دې غونډه کې د اړوندو مسائلو په اړه د سوداګریزو بانکونو مسئولینو خپل نظرونه او وړاندیزونه د افغانستان بانک له لومړي مرستیال سره شریک کړل او په هېواد کې یې د مالي خدمتونو د پراختیا په برخه کې د هلو ځلو ژمنه وکړه.
