د هېواد د بانکي سکتور په تړاو د افغانستان بانک خبرتیا
څرنګه چې ګران هېوادوال په جریان کې دي، سوداګریز بانکونه په ټولیزه توګه فعال او د بانکي خدمتونو په وړاندې کولو بوخت دي او د نقدینه ګۍ د وضعیت د ښه والي پر بنسټ انفرادي مشتریانو ته د نغدو پیسو ورکړه زیاته شوې او د شرکتي حسابونو په برخه کې هم د افغانستان بانک د لازم لیدو په صورت کې د هغوي د پولي اړتیاوو د پوره کولو لپاره ډېری اسانتیاوې رامنځ ته شوي دي.
حال دا چې په دې وروستیو کې د ټولنیزو شبکو له لارې ځینې بې بنسټه آوازې خپرېږي څو بانکي سکتور ته زیان ورسوي.
په همدې موخه د بانکونو ټولو مشتریانو او ګرانو هېوادوالو ته ډاډ ورکول کېږي چې د هېواد بانکي سکتور فعال او د خلکو په خدمت کې دی او په بانکونو کې د امانت اېښودونکي امانتونه خوندي دي. همدا ډول د افغانستان بانک په منظمه توګه د سوداګریزو بانکونو د کړنو او اجرااتو څارنه کوي او د بانکوالۍ د ودې او عادي حالت ته د هغه د بیرته راوستلو په برخه کې هڅه او کوښښ کوي او هېوادوالو ته ډاډ ورکوي چې ډېر ژر به د هېواد بانکي سکتور د تیر په څیر عادي حالت ته راوګرځي.
