د افغانستان بانک معلوماتو ته لاسرسی د خلکو حق ګڼي او په جدي ډول یې رعایتوي
۱۴۴۴ محرم الحرام ۱۳ مه - د افغانستان بانک چارواکو ملت ته د حکومت د حساب ورکونې پروګرام په دوام کې نن د افغانستان بانک د یو کلن فعالیت او لاسته راوړنو راپور د حکومت د رسنیو په مرکز کې د رسنیو له لارې د خلکو سره شریک کړ.
په پیل کې د افغانستان بانک د ټولو سرپرست رئیس ښاغلي عبدالقاهر (حاجي ادریس) د افغانستان بانک د مهمو لاسته راوړنو په اړه خبرې وکړې او ویې ویل، خوښ یم چې له دې فرصت څخه په استفادې د بانک د کړنو او فعالیتونو راپور له درنو هیوادوالو سره شریکوو.
نوموړي زیاته کړه چې د افغانستان بانک د خپلو سیاستونو د پلي کولو او د کړنو په اړه راپور ورکولو ته خورا ډیر ارزښت ورکوي. ځکه چې د اغیزناکو مالي او پولي سیاستونو پلي کول د خلکو د پیر له ځواک څخه د ملاتړ او د ټولنې له زیانمنونکي قشر سره د همکارۍ په معنا دي او خلک حق لري، ترڅو پوه شي چې د افغانستان بانک په دې برخه کې کومې کړنې ترسره کړي دي.
ښاغلي حاجي ادریس همدا راز زیاته کړه، چې په هېواد کې له سیاسي بدلون وروسته د سوداګریزو بانکونو د فعالیت خوندیتوب، د نغدینګۍ مدیریت او د مشتریانو د امانتونو د ورکولو، د خلکو لپاره د لومړنیو توکو او خدمتونو د عرضه کولو په موخه د بهرنیو لېږدونو د اسانتیا او هیوادوالو لپاره د بانکي خدمتونو د وړاندې کولواو تنظیمولو لپاره بې دریغه هڅې کړې دي چې د مالي او بانکي کارپوهانو د وړاندوینو برعکس يې تراوسه په بریالۍ توګه د بانکي سکتور خوندیتوب او ټېکاو ساتلی دی.
ورپسې د افغانستان بانک د پالیسۍ ستر سلاکار ښاغلي لطف الحق نور پسرلي د پولي سیاستونو د اغیزناک تطبیق او د بانکي سکتور د کړنو په اړه خبرې وکړې او ویې ویل، مرکزي بانک د مقرراتي چارو د تنظیم، د پیرودونکو ستونزو ته د رسېدنې، نقدینګۍ د مدیریت، د سوداګریزو بانکونو د فعالیتونو د دوام، د بانکي خدمتونو د وړاندې کولو د تنظیم، د صرافانو او مالي خدمتونو د وړاندې کولو په برخه کې د اسانتیاوو د رامنځته کولو، په تخنیکي کچه د خبرو اترو او د امریکا د متحده ایالتونو د خزانې څخه د عمومي جوازونو د ترلاسه کولو او د خلکو د اړتیا وړ توکو د تورید لپاره د نړیوالو لیږدونو د اسانتیا په موخه دې ادارې اغیزناک فعالیتونه ترسره کړي دي.
د افغانستان بانک د پالیسۍ ستر سلاکار همدارنګه د مالي او بانکي ستراتیژیک پلان یادونه وکړه چې د سکټور د بیا رغولو او د بانکونو د فعالیتونو د نورمال کولو لپاره په پام کې نیول شوی او ډاډ یې ورکړ چې د افغانستان بانک د بانکونو د عادي کولو لپاره د شریکانو سره همکار دی، نوموړي زیاته کړه چې هیله لرو ژر تر ژره د پام وړ پایلې ترلاسه کړو.
ورپسې د بازار د عملیاتو لوی آمر ښاغلي محمد عباس سامح خبرې وکړې او یادونه یې وکړه چې په هیواد کې د شته ننګونو سره سره بیا هم په تېر کال کې د افغانيو نرخ د سيمې د نورو اسعارو په پرتله په نسبي ډول ثابت پاتې شوى دى.
ښاغلي سامح د هیواد د بهرنیو اسعارو د زېرمو د خلاصون په اړه د تخنیکي بحثونو د پرمختګ په اړه هم خبرې وکړې او ویې ویل، چې له بهرنیو شریکانو سره په بېلابېلو کچو تخنیکي خبرې اترې شوي دي او د بهرنیو اسعارو د زېرمو په اړه هر اړخیز پلان له دوی سره شریک شوی دی.
