د افغانستان بانک، سوداګریزو بانکونو او کوچنیو مالي ادارو لپاره د پوهاوۍ پروګرام جوړ کړ
کابل، ۱۳۹۸ د وري ۲۱ـ د افغانستان بانک د عامه اعتبارونو د ثبت په سیستم کې د پرمختګونو په پام کې نیولو سره مالي پیسو ته د خلکو د لاسرسۍ د اسانتیاو په موخه د سوداګریزو بانکونو او د کوچنیو مالي ادارو استازو لپاره د پوهاوۍ پروګرام په لاره واچوه.
د افغانستان بانک لومړي مرستیال او سرپرست ښاغلي واحد الله نوشیر د افغانستان په بانکي نظام کې د عامه اعتبارونو د ثبت او د منقولو اموالو د رهني حقونو د ثبت د سیستمونو په ارزښت باندې د خبرو په ترڅ کې وویل چې د دې پروګرام د جوړیدو موخه، د اعتباري معلوماتو د راټولولو لپاره د عامه اعتبارونو د ثبت د سیستمونو د معاصره میتودونو کارونه ده.
همدا ډول، د افغانستان بانک لومړي مرسیتال زیاته کړه چې د افغانستان بانک د بانکدارۍ په سیستمونو کې د پرمختګ په پام کې نیولو سره او د عامه اعتبارونو د ثبت او منقولو اموالو د رهني حقونو د ثبت د سیستمونو د دویم پړاو د تطبیقولو په برخه کې د هغوي د تجهیز لپاره ځینې پلانونه تر لاس لاندې لري؛ په همدې موخه یې د پوهاوۍ پروګرام جوړ کړ څو په دې برخه کې د زده کړې په ترلاسه کولو سره، مالي پیسو ته د لاسرسۍ د لا اسانتیا ترڅنګ د عامه اعتبارونو د ثبت سیستم، د احتمالي مالي خطرونو د کموالي او د پور په ترلاسه کولو کې د اسانتیاو د رامنځ ته کولو لامل کیږي.
