د افغانستان بانک د ټولو سرپرست رئیس د صرافانو د ټولنو له استازو سره ولیدل
۱۴۴۶ محرم الحرام ۱۱ – د افغانستان بانک د ټولو سرپرست رئیس ښاغلي نور احمد آغا په مشرۍ د صرافانو د ټولنو له استازو سره غونډه جوړه شوه.
د دې غونډې په پیل کې د افغانستان بانک د ټولو سرپرست رئیس ښاغلي نور احمد آغا وویل چې د افغانستان بانک ژمن دی ترڅو ګران هېوادوال د صرافۍ او پولي خدمتونو په برخه کې له خوندي او ډاډمنو خدماتو څخه برخمن شي او د دې موخې د ترلاسه کولو په پار به د صرافیو او پولي خدمتونو وړاندې کوونکو د فعالیتونو د مؤثریت او ښه والي لپاره په پرله پسې توګه هلې ځلې وکړي ترڅو یاد سکتور د افغانستان بانک د قانون په رڼا کې میکانیزه کړي او هېوادوالو ته د ډاډمنو پولي خدمتونو په برخه کې آسانتیاوې رامنځته کړي. همداراز، د افغانستان بانک د ټولو سرپرست رئیس ښاغلي نوراحمد آغا د صرافانو ستونزې او غوښتنې واوریدې او ژمنه یې ورسره وکړه چې د هغوی ستونزو ته به د بانک د اړوندو آمریتونو د اصولو او مقرراتو په رڼا کې مناسبې حل لارې وموندل شي.
د غونډې په دوام کې د صرافانو د ټولنو استازو ژمنه وکړه چې خپل ټول فعالیتونه به د افغانستان بانک د قوانینو او مقرراتو په رڼا کې ترسره او د خلکو لپاره به اړینې آسانتیاوې رامنځته کړي.
د یادونې وړ ده چې په دې غونډه کې د افغانستان بانک د ریاست د دفتر لوی آمر ښاغلي صدیق الله خالد او د غیر بانکي مالي مؤسسو د څارنې لوی آمر ښاغلي احمد ظاهر ناصرزي او نورو اړوندو همکارانو هم ګډون کړی وو.
