د بانکونو سره د اداینو د ملی سویچ د همغږۍ غونډه جوړه شوه
1397کال د سلواغې میاشت، د سوداګریزو بانکونواستازو، د افغانستان د اداینې سیستم د ادارې مسؤلانو، د افغانستان بانک د مالي چارو د څارنې لوی آمریت او د مالي پراختیا لوی آمریت په ګډون سره د افغانستان بانک د کنفرانسونو په تالار کې غونډه جوړه شوه.
د دې غونډې موخه د ملي سويچ په توګه د افغانستان د اداینې سیستم د ادارې د نوي حقوقي جوړښت، سوداګریز موډل، تخنیکي موډل او د بانکونو ترمنځ د نښلولو د ګډ عملیاتي پروسې په اړه د معلوماتو وړاندې کول ؤ.
د غونډې په پیل کې د افغانستان د اداینې ادارې رئیس ښاغلي مصطفی کاکړ د دې ادارې د نوي حقوقي جوړښت، د غونډې د جوړولودلیل او د افغانستان د اداینې ملي سویچ د نويو شرایطو په هکله معلومات وړاندې کړل. ورپسې د افغانستان د اداینې سیستم ادارې د سواګریزې برخې مسؤل ښاغلي محمد علی اسلمي د ملي سویچ په توګه د دې ادارې نوي جوړښت ، موخو، دندو او د دې سويچ لخوا وړاندې کیدونکو خدمتونو په هکله په تفصیل سره معلومات وړاندې کړل.
په همدې حال کې د افغانستان د اداینې سیستم ادارې د معلوماتي تکنالوژۍ برخې مسؤل ښاغلي مسعود لطیف او د عملیاتي برخې مسؤل ښاغلي اسدالله مشفق د مالي مؤسسو ترمنځ د ګډې عملیاتي او تخنیکي پروسې د نښلولو په هکله خپل توضیحات ورکړل.
د غوڼدې په پای کې د بانکونو استازو د موضوع په اړه خپلې ستونزې مطرح کړل چې د افغانستان د اداینې سیستم ادارې، د افغانستان بانک د مالي چارو د څارنې لوی آمریت او د مالی پراختیا لوی آمریت د مسؤلانو لخوا اړین توضیحات ورکړل شو.
