د مشرانو جرګې د شکایتونو د اوریدو کمېسیون د تورونو ردول

کابل- افغانستان: د افغانستان بانک د مشرانو جرګې د شکایتونو د اوریدو کمېسیون لخوا لویې څارنوالۍ ته د ښاغلي اجمل احمدي معرفي کول ناسم عمل بولي او هغه د لاندې دلایلو پر بنسټ ردوي.

د صنعت او سوداګرۍ وزارت: د صنعت او سوداګرۍ وزارت د تیرو کلونو تشکیل تخنیکي ستونزې (د دریم، څلورم، پنځم او شپږم بستونو له ډلې اویا سلنه تخنیکي بستونو د دندو ورته لایحې) درلودې. له همدې امله، د بنسټیزو موخو د پلي کیدو په موخه د صنعت، سوداګرۍ او پانګونې د سکتورونو تشکیل تر بیاکتنې او ارزونې لاندې ونیول شو.

د ۱۳۹۹ مالی کال تشکیل له غور او څېړنې وروسته د اړوندو تقنیني سندونو پر بنسټ جوړ او ترتیب شوی او د صنعت او سوداګرۍ وزارت د مشرتابه پلاوي له ګډې هڅې وروسته یاد تشکیل د قانوني طی مراحلو لپاره د اداري اصلاحاتو کمېسیون ته استول شوی دی. د صنعت او سوداګرۍ وزارت د ۱۳۹۹ مالي کال د تشکیل طرحه د جمهوري ریاست د عالي مقام د  ۱۳۷ ګڼې ۱۳۹۹/۱/۲۶ نېټې حکم پر بنسټ منظوره شوې ده.

په منظور شوي تشکیل کې ۳۰۰ بستونه چې د دندو سرلیک یې بدلون او یا له یوې برخې بلې برخې ته لیږدول شوي ؤ په ورته بستونو کې ځای پر ځای شوي دي. البته ۲۱ بستونه چې د دندو لایحو یې له ۳۰ سلنې څخه ډېر بدلون درلوده، بستونه یې د اداري اصلاحاتو او ملکي خدمتونو د کمېسیون د پلي کیدوونکي کړنلارې پر بنسټ د اعلان وړ وګڼل شول. دا ۲۱ بستونه د ټول تشکیل یو نیم سلنه جوړوي. د یادونې وړ ده چې دا اشخاص د هغو بستونو له اعلان وروسته چې د دندو لایحو یې بدلون موندلی دی، کولای شي بیا ځلې د ګمارنې په پروسه کې ګډون وکړي.

د افغانستان بانک: د دافغانستان بانک پنځه تنه کارکوونکي د عالي شورا د پرېکړې او د د افغانستان بانک د قانون د ۲۰ مادې او د یادې شورا د پرېکړې له اوریدو وروسته د د افغانستان بانک د قانون د ۱۲ مادې په پام کې نیولو سره د افغانستان د اسلامي جمهوریت د عالي مقام د پرېکړې پر بنسټ او د هېواد د نافذه قوانینو په رڼا کې له خپلو دندو ګوښه شوي دي. یاد اشخاص د اداري فساد په اوو قضیو کې تورن دي او د نورو څېړنو په موخه یې اسناد د لویې څارنوالۍ محترمې ادارې ته لیږل شوي دي.

له دې مخکې، د سوداګرۍ او صنایعو وزارت پخوانی او د د افغانستان بانک اوسنی سرپرست، ښاغلی اجمل احمدي د سوداګرۍ او صنایعو وزارت له مرستیال او د اداري اصلاحاتو او ملکي خدمتونو د کمیسیون له استازو سره یوځای د مشرانو جرګې د شکایتونو اوریدو کمیسیون د غړو پوښتنو ته د ځواب ورکولو لپاره د دې کمیسیون په یوه رسمي غونډه کې ګډون کړی ؤ، چې په پای کې د شکایتونو د اوریدو کمیسیون رئیس د تخنیکي او اداري موضوعاتو پرځای شخصي بحثونه مطرح کړل او شخصي تورونه یې ولګول.

په پای کې یو وار بیا مونږ دا تورونه ردوو او خلکو ته د هر ډول ځواب ویلو لپاره چمتو یو.