د قرغزستاني پلاوي سره د بانکي اړیکو د پراختیا په موخه غونډه ترسره شوه
د ۱۴۴۷ کال د جمادي الثاني ۲۷ مه - د افغانستان بانک او قرغزستاني پلاوي تر منځ د بانکي اړیکو د پراختیا په موخه غونډه ترسره شوه، چې په ترڅ کې یې د دواړو هېوادونو ترمنځ د بانکي اړیکو، مالي همکاریو او یو شمېر نورو اړوندو موضوعاتو په اړه هر اړخیز بحثونه وشول.
په دې غونډه کې د افغانستان بانک لومړي مرستیال، ښاغلي صدیقالله خالد، وویل چې د افغانستان بانک له ټولو نړیوالو مالي او بانکي بنسټونو سره د اغېزناکو او دوامدارو اړیکو غوښتونکی دی او د افغانستان بانک غواړي د قرغزستان له جمهوري دولت سره د سوداګریزو اړیکو د پراختیا په موخه غوره او منظمې بانکي اړیکې رامنځته کړي.
ښاغلي خالد ټینګار وکړ چې د بانکي همکاریو پیاوړتیا کولای شي د دواړو هېوادونو ترمنځ د سوداګرۍ، پانګونې او اقتصادي تعاملاتو لپاره اسانتیاوې رامنځته کړي او د سیمې په کچه د مالي ثبات سبب شي.
د قرغزستاني پلاوي غړو چې د یاد هېواد د مالیې وزارت مرستیال یې مشري کوله د دواړو هېوادونو ترمنځ د بانکي او اقتصادي همکاریو د پراختیا پر اهمیت ټینګار وکړ او د ګډو همکاریو د پراخېدو لپاره یې خپل چمتووالی څرګند کړ.
د یادونې وړ ده چې په دې غونډه کې د تخنیکي کمېټو پر جوړېدو هوکړه وشوه، ترڅو د چارو د پرمختګ لپاره یادې کمېټې د دواړو هېوادونو له اړخه تخنیکي بحثونه تر سره کړي.
