د ترهګرۍ د تمویل او پیسو وینځلو څخه د مخنیوي د همغږۍ عالي کمیسیون غونډه جوړه شوه
د ۱۳۹۷ کال د کب ۷ مه- د ترهګرۍ د تمویل او پیسو وینځلو د مخنیوي د همغږۍ عالي کمیسیون د همکارۍ لومړی غونډه د افغانستان بانک په مرکزي دفتر کې جوړه شوه. د دې غونډې اصلي موخه له پیسو وینځلو سره مبارزه، د ترهګرۍ د مالي سرچینو د له منځه وړل او همدا ډول د پیسو له قاچاقولو او مالي جرایمو څخه د مخنیوي په موخه د طرحې او پالیسۍ رامنځته کول وو. د افغانستان بانک او د ترهګرۍ د تمویل او پیسو وینځلو د مخنیوي دهمغږۍ عالي کمیسیون رئیس ښاغلي خلیل صدیق وویل چې د دې کمیسیون اصلي دندې د ترهګرۍ د تمویل او پیسو وینځلو له جرایمو څخه د مخنیوي لپاره د طرحې او پالیسي رامنځته کول، له رامنځته شوې پالیسۍ څخه ارزونه او څارنه، د کمیسیون د داخلي همکاریو لپاره د یوه منظم چوکاټ رامنځته کول، د نړیوالو معیارونو او اړتیاوو په ځانګړي توګه د (FATF) یا د نړیوالو مالي اقداماتو د ډلې د وړاندیزیونو مراعت کول، د پیسیو وینځلو او د ترهګرۍ د تمویل د مخنیوي د قانون په اړه د وړاندیزونو او تعدیلاتو ارزونه، د اړوند اداراتو ترمنځ د همغږۍ رامنځته کول، د ښې همکارۍ په موخه د ښوونیزو ورکشاپونو ترسره کول، په ملي او نړیواله کچه د پیسو وینځلو او د ترهګرۍ د تمویل او مالي جرایمو څخه د مخنیوي لپاره د همغږۍ ترسره کول، ګڼل کېږي.ښاغلي خلیل صدیق زیاته کړه چې د اړوندو اداراتو په ښې همغږۍ او همکارۍ سره به د تروریزم له مالي سرچینو، نشه یې توکو، پیسو وینځلو او مالي جرایمو څخه مخنیوي ترسره شي او په دې برخه کې به مثبت اغیز وکړي.د ملګرو ملتونو د سازمان غړې هم په یاده غونډه کې له یاد کمیسیون سره د مرستې ټټر وواهه او زیاته کړه چې د مالي جرایمو او د ترهګرۍ د تمویل مخنیوی کولای شي مالي او اقتصادي پرمختګ ته لاره هواره کړي.په پاې کې پریکړه وشوه چې د کمیسیون د پالیسۍ او طرحې د تصویب غونډه به د راتلونکې یوې میاشتې په ترڅ کې ترسره شي، څو د کمیسیون د همکارۍ او د اړوندو ادارو د همغږۍ چارې کړندۍ شي.د ترهګرۍ د تمویل او پیسو وینځلو څخه د مخینوي قانون د دري دېرشمې مادې پربنسټ یاد کمیسیون د ۱۰ دولتي ادارو په ګډون رامنځته شوی چې د ترهګرۍ د تمویل او مالي جرایمو څخه د مخینوي لپاره د ښې همغږۍ او همکارۍ له لارې خپلې کړنې ترسره کوي.د یادونې وړ ده چې په دې غونډه کې د افغانستان بانک د لوی رئیس سربېره د مالیې، عدلیې، بهرنیو چارو، کورنیو چارو، د نشه توکو پروړاندې د مبارزې وزارتونو ، لویې څارنوالۍ، د ملي امنیت شورا او ملي امنیت ریاست استازو او د افغانستان د مالي معاملو او راپورنو د څیړنې مرکز مشرتابه پلاوي ګډون کړی وو.
