د افغانستان بانک د سرپرست او ورسره پلاوي ولایتي سفر
۱۴۰۰ کب ۲۱- د افغانستان بانک د سرپرست ښاغلي حاجي ادریس پر مشرۍ یو پلاوي چې د دې بانک د ریاست د دفتر لوی آمر ښاغلی صدیق الله خالد یې هم ملتیا کوي د روانې کب میاشتې پر ۱۸ مه نېټه له ټولو زونونو څخه د لیدنې لپاره سفر پیل کړ.
د افغانستان بانک د سرپرست پر مشرۍ پلاوی د کب میاشتې پر ۲۱ مه نېټه شمال ختیځ زون ته ورسید او د یاد زون د آمر په ملتیا یې د اړوند زون له ولایتي نمایندګیو چې کندز، تخار، بدخشان او شیرخان بندر په کې شامل دي له کړنو څارنه وکړه.
په دې لیدنه کې د یادو نمایندګیو د کارکوونکو ستونزې واورېدل شوې او د حل په موخه یې اړوندو څانګو ته د افغانستان بانک د سرپرست ښاغلي حاجي ادریس لخوا اړینې سپارښتنې وشوې. باید وویل شي چې له یادو نمایندګیو څخه تر لیدنې وروسته په شمال ختیځ زون کې د ټولو نمایندګیو د استازو په ګډون د چارو د لا همغږۍ په موخه غونډه تر سره شوه. د دې غونډې په اوږدو کې هر اړخیز بحثونه تر سره شول او د افغانستان بانک د سرپرست لخوا د غونډې ګډوالو ته اړینې لارښوونې وکړې.
په دې غونډه کې د افغانستان بانک سرپرست رئیس ښاغلي حاجي ادریس د اړوند زون له کارکوونکو څخه وغوښتل، ترڅو د خلکو لپاره د خدمت په موخه خپلې چارې په پوره صداقت، اخلاص او مسئولیت سره تر سره کړي.
د زون کارکوونکو هم ژمنه وکړه چې د چارو د پرمختګ لپاره به له هېڅ ډول هلو ځلو درېغ و نه کړي او په پوره رېښتنولۍ سره به د خلکو لپاره خدمت کوي.
د یادونې وړ ده چې د دې سفر موخه په چارو کې چټکتیا، هغمږي او له نږدې څخه د افغانستان بانک د زونونو او نمایندګیو د ستونزو لیدل او د دوی مشکلاتو ته د حل لارو موندل دي. د یادونې وړ ده چې د افغانستان بانک د سرپرست رئیس او ور سره پلاوي سفر د هیواد نورو زونونو او نمایندګیو ته دوام لري.
