د افغانستان بانک د شریعه بورډ غونډه جوړه شوه
۱۴۰۰ د لړم ۸ مه – د شریعه بورډ درېیمه غونډه د افغانستان بانک د دویم مرستیال ښاغلي عبدالقدیر احمد په مشرۍ جوړه شوه.
په یاده غونډه کې د افغانستان بانک دویم مرستیال یادونه وکړه چې د افغانستان بانک مشرتابه پلاوی د اسلامي بانکوالۍ د پرمختګ لپاره ژمن دی او په دې برخه کې د دې بانک د شریعه بورډ سره د هر ډول همکارۍ لپاره چمتو دی.
د نوموړي په خبره که څه هم په هېواد کې تر وړاندې د اسلامي بانکوالۍ د پرمختګ لپاره کار شوی دی، خو د افغانستان د اسلامي امارت په راتګ سره به د دې بانکوالۍ د لا پرمختګ لپاره د پام وړ ګامونه پورته شي.
د ښاغلي عبدالقدیر احمد په خبره د اسلامي بانکوالۍ د پراختیا او پرمختګ لپاره په یوه جامع طرحه کار روان دی چې په بشپړېدو سره به ریاست الوزرا ته منظورۍ لپاره واستول شي.
د یادونې وړ ده چې په دې غونډه کې پر یو شمېر نورو اړوندو موضوعګانو هم خبرې اترې وشوې او د غونډې د ګډونوالو تر منځ د نظرونو تبادله تر سره شوه.
