د افغانستان بانک سرپرست او لومړي مرستیال د چین سفارت له استازو سره ولیدل
کابل، د ۱۳۹۸ کال د زمري ۲ مه – د افغانستان بانک د لومړي مرستیال او سرپرست ښاغلي واحدالله نوشېر تر مشرۍ لاندې د چین سفارت له استازو سره غونډه جوړه شوه.
په دې غونډه کې د افغانستان بانک سرپرست او لومړي مرستیال ښاغلي واحدالله نوشیر یادونه وکړه، چې افغانستان او چین له ډېرې پخوا زمانې له یو بل سره د بانکدارۍ او سوداګرۍ په برخه کې اړیکې لري او تمه یې وښوده چې دا اړیکې به لا پراختیا ومومي.
په یاده غونډه کې د چین سفارت استازو ته د افغانستان بانک د پولي سیاست د عمومي آمریت د آمر ښاغلي نایب خان جمال له لوري د پولي سیاست، اداینو د بېلانس او ټولیز اقتصاد په اړه معلومات ورکړل شول.
د یادونې وړ ده چې په دې غونډه کې په افغانستان کې د چین سفارت د استازو سربېره د افغانستان بانک د یو شمېر آمریتونو آمرینو هم ګډون کړی وو.
