د افغانستان بانک سرپرست د مالي سکتور د ټینګښت او پولي سیاستونو د تطبیق په برخه کې د وروستیو لاسته راوړنو په اړه د هېواد د جلالتمآب ولسمشر حضور ته راپور وړاندې کړ
د افغانستان بانک سرپرست ښاغلي اجمل احمدي د ۱۴۰۰ کال د غبرګولي په ۱۷ نېټه د دوشنبې په ورځ د هېواد له ولسمشر جلالتماب محمد اشرف غني سره ولیدل او د افغانستان بانک د وروستیو کړنو په اړه یې راپور وړاندې کړ.
د دې لیدنې په ترڅ کې د افغانستان بانک سرپرست ښاغلي اجمل احمدي د اغېزناکو پولي سیاستونو د تحقق او د مالي او بانکي نظام د ټینګښت په برخه کې د جوړښتیزو اصلاحاتو، له نړیوالو پولي او مالي بنسټونو سره د هېواد د مالي کړنو د میکانیزه کولو په برخه کې د ژمنو د تطبیق او د سوداګریزو بانکونو له لوري خصوصي سکتور ته د پورونو د ورکړې په برخه کې د آسانتیاوو پر رامنځته کولو او یو شمېر نورو اقتصادي برخو کې د افغانستان بانک پر لاسته راوړنو په اړه معلومات وړاندې کړل.
ورپسې د هېواد ولسمشر جلالتمآب محمد اشرف غني د مالي نظام د ټینګښت او ټیکاو او د کرونا په دې حساسو شرایطو کې چې هېواد او ټوله نړۍ ور سره لاس او ګریوان ده او دا مهال له یو ستونزمن پړاو څخه تېريږي د معقولو پولي سیاستونو د طرحو او تطبیق په برخه کې د افغانستان بانک د سرپرست ښاغلي اجمل احمدي له هڅو د ستاینې ترڅنګ وویل، بانکونه د کوچنیو او منځنیو پانګو اچونو لپاره د پورونو په برخه کې د آسانتیاوو په رامنځته کولو سره کولای شي د افغانستان په اقتصادي وده کې اغېزناک رول ولوبوي.
