د افغانستان بانک مشرتابه پلاوي په کابل کې د ایـټالیا سفارت له استازو سره وکتل
د ۱۳۹۸ کال د وری ۲۰ مه – د افغانستان بانک مشرتابه پلاوي په کابل کې د ایټالیا سفارت د مرستیال سره د اقتصادي ودې، بانکدارۍ سکتور د پرمختګ او بانکدارۍ نظام د وضعیت په اړه د افغانستان بانک په مرکزي دفتر کې غونډه وکړه.
د افغانستان بانک لومړي مرستیال او سر پرست رئیس ښاغلي واحدالله نوشیر په هېواد کې د افغانستان بانک او بانکي نظام د یوې نیمې لسیزې لاسته راوړنو او کړنو ته په اشارې سره وویل چې د افغانستان بانک د اقتصادي ودې په موخه هڅه کوي چې مالي آسانتیاوو ته لاسرسي سره خلک وکولای شي وړو او منځنیو سوداګریو په رامنځته کولو سره د هېواد په اقتصادي وده او پرمختګ کې خپل سهم ادا کړي.
په کابل کې د ایټالیا سفارت استازو هم له د افغانستان بانک سره د دوه اړخیزو همکاریو لپاره چمتوالی وښود او د افغانستان د اقتصادي او مالي نظام د لا پرمختګ لپاره یې پر کړو ژمنو ټینګار وکړ.
د یادونې وړ ده چې په دې غونډه کې د افغانستان بانک د لومړي مرستیال او سرپرست سربېره، په کابل کې د ایټالیا سفارت مرستیال، د ایټالیا سفارت لومړي سکرتر، د افغانستان بانک د مالي چارو څخه د څارنې لوی آمر او د پولي سیاست لوی آمریت مرستیال ګډون کړی وو.
