د افغان یونایټډ بانک عملیاتي کارکوونکو ته د بانکي سکتور د مشتریانو د حقونو رعایتولو په هکله روزنیز ورکشاپ جوړ شو
د ۱۴۴۶ محرم الحرام ۱۱ -- د افغانستان بانک د بانکوالۍ په سکتور کې د مشتریانو د حقونو د خوندیتوب، خلکو ته د معیاري بانکي خدمتونو د وړاندې کولو او خوندي، مناسبو او با کیفیته مالي خدمتونو ته د خلکو د لاسرسي په موخه د بانکونو عملیاتي څانګو لپاره یو لړ روزنیز پروګرامونه په پام کې نیولي دي چې لومړی پروګرام یې په افغان یونایټډ بانک کې ترسره شو. په دې پروګرام کې د مرکزي دفترونو عملیاتي کارکوونکو په حضوري توګه او له ولایتونو څخه په آنلاین ډول روزنه ترلاسه کړه.
د دې روزنیز پروګرام په پیل کې د افغانستان بانک د ریاست د دفتر لوی آمریت مرستیال ښاغلي شفیق الله بارز خبرې وکړې او ویې ویل چې اسلامي مالي خدمتونو ته د خلکو پراخه لاسرسی د افغانستان بانک له لومړیتوبونو څخه دی. هغه وويل، بانکونه مالي خدمتونو ته د خلکو د لاسرسي برابرولو له لارې د هېواد په اقتصادي وده کې مهم رول لوبوي، ځکه چې د خلکو لخوا د مالي خدمتونو کارول او مالي خدمتونو ته د خلکو لاسرسى دې ته زمینه برابروي چې د هېواد وګړي په اقتصادي فعاليتونو کې لا ډېره برخه واخلي. همداراز، دا چاره د پراخه اقتصادي ودې، د کاري فرصتونو رامنځته کولو، د عوایدو د نابرابرۍ او له ټولنې څخه د بېوزلۍ له منځه وړلو په څېر د لويو اقتصادي موخو د ترلاسه کولو په لاره کې اغېزناک رول لوبوي.
ښاغلي بارز د خپلو خبرو په یوه بله برخه کې د مشتریانو د حقونو پر ملاتړ ټینګار وکړ او ویې ویل چې د بانکي خدمتونو او محصولاتو د وړاندې کولو په برخه کې سالمه سیالي او نوښت، د بانکي خدمتونو د کیفیت ښه کول، د مشتریانو د معلوماتو محرمیت ساتل، د مشتریانو شکایتونو ته رسیدنه او هغوی ته د اړینو آسانتیاوو برابرول د مالي خدمتونو د پراختیا مهمې اړتیاوې دي.
د دې ورکشاپ په ادامه کې د مالي سکتور د مشتریانو له حقونو څخه د ملاتړ او د مشتریانو شکایتونو ته د رسیدنې په هکله د نړیوالو اصولو، مفهومونو، لارښوونو او سالمو کړنلارو، او د مالي شمولیت مناسبو لارو چارو په تړاو د مالي خدمتونو د پراختیا لوی آمریت کارکوونکو لخوا ګټور پریزنټیشن وړاندې شو.
د ورکشاپ جمعبندي د افغانستان بانک د مالي خدمتونو د پراختیا لوی آمریت مرستیال ښاغلي احمد خالد واحدي لخوا ترسره شوه او د ګډونوالو له پوښتنو، ځوابونو او وړاندیزونو سره پای ته ورسید.
