د لویدیځ زون د صرافانو او د پولي خدمتونو وړاندې کوونکو لپاره روزنیز او د پوهاوي پروګرام
هرات، ۱۳۹۸ کال د لیندۍ ۶ مه- د افغانستان بانک د مالي چارو د څارنې لوی آمریت لخوا په لویدیځ زون کې "د صرافانو او د پولي خدمتونو د وړاندې کوونکو د کړنو د تنظیم د مقررې د روزنې او د صرافۍ او پولي خدمتونو شرکتونو ته د صرافیو او انفرادي پولي خدمتونو د حقوقي جوړښت د بدلون په اړه د پوهاوۍ " تر سرلیک لاندې روزنیز پروګرام جوړ شو.
دا پروګرام د افغانستان بانک د لویدیځ زون د آمر ښاغلي انور شاه یوسفي لخوا پرانېستل شو چې نوموړي د دې پروګرام د موخو او ارزښت په اړه ګډون کوونکو ته معلومات وړاندې کړل.
ورپسې د افغانستان بانک د مالي چارو د څارنې د لوی آمریت د صرافانو او پولي خدمتونو د څارنې لوی مدیر ښاغلي شاه پور میاخیل د صرافانو او د پولي خدمتونو د وړاندې کوونکو د څارنې د موخو، مسؤولیتونو، مکلفیتونو او مجازو او منع شویو کړنو په تړاو ګډون کوونکو ته اړین توضیحات وړاندې کړل. هغه زیاته کړه چې د افغانستان بانک د هېواد د مالي نظام د خوندیتوب، ټیکاو او ښه والي په موخه تل هڅه کړې څو د ټولو مالي معاملو څارنه وکړي او چا ته د دې اجازه ورنکړي چې له وړاندې شویو فرصتونه څخه د پیسو وینځلو په موخه ګټه پورته کړي.
ښاغلي میاخیل ټينګار وکړ چې د افغانستان بانک هر کال د قوانینو او مقرراتو د رعایتولو او ښه پلي کولو په برخه کې د صرافانو او د پولي خدمتونو د وړاندې کوونکو د کاري ظرفیت د لوړولو په موخه په ټول هېواد کې بېلابېل او ګڼ شمېر پروګرامونه جوړ کړې دي او دا پروسه به دوام ولري.
وروسته د مالي چارو د څارنې د لوی آمریت د جواز ورکونې مدیر د صرافیو او د انفرادي پولي خدمتونو د جوړښت د بدلون په تړاو خبرې وکړې او یادونه یې وکړه چې د صرافیو او د پولي خدمتونو د شرکتونو کړنې په معیارونو برابرې دي.
نوموړي د صرافیو او مالي خدمتونو شرکتونو د ګټورتیاوو په توضیح کولو سره ټول صرافان او د مالي خدمتونو وړاندې کوونکي وهڅول څو د صرافیو او پولي خدمتونو د شرکت جواز واخلي.
همدا ډول، د مالي چارو د څارنې د لوی آمریت د پیسو وینځلو او د ترهګرۍ د تمویل پر وړاندې د مبارزې د مدیریت مرستیال ښاغلی محمد الیاس ظاهر د اړوندو قوانینو او مقررو په رڼا کې د پیسو وینځلو او د ترهګرۍ د تمویل پر وړاندې د مبارزې په برخه کې د صرافانو او د پولي خدمتونو د وړاندې کوونکو د مسؤولیتونو په اړه معلومات ورکړل او په دې برخه کې یې د صرافانو د ستونزو د حل په تړاو توضیحات وړاندې کړل.
په ورته وخت کې، د هرات د صرافانو د ټولنې رئیس د دې ډول پروګرامونو جوړول ګټور وګڼل او په دې برخه کې یې د افغانستان بانک د ډیرو مرستو غوښتنه وکړه. ورپسې د مالي چارو د څارنې د لوی آمریت د ګمارل شوي پلاوي لخوا د صرافانو او د پولي خدمتونو د وړاندې کوونکو وړاندیزونه او نظرونه واوریدل شول او د هغوی پوښتنو ته مناسب ځوابونه ورکړل شول.
د یادونې وړ ده چې په دې پروګرام کې د یاد ولایت شاوخوا ۵۰۰ تنو د مالي خدمتونو وړاندې کوونکو، صرافانو، د سوداګریزو بانکونو د نمایندګیو مدیرانو، د سوداګرۍ خونې، د امنیې قومندانۍ، ملي امنیت او د ولایت د مقام استازو ګډون کړی وو.
