د افغانستان بانک ته د عبدالغفار داوی د قضیې راتلل
۱۳۹۹ د زمري ۷- د کابل بانک کړکیچ د فساد له هغو سترو قضیو څخه ګڼل کیږي چې له امله یې ډېری شمېر افغانانو خپلې پانګې له لاسه ورکړي دي. دا کړکیچ د افغانستان د بانکوالۍ سکتور ته یوه ستره ضربه ده.
د کابل بانک قضیه چې د قضیو د څېړنې د یو خپلواک کمېسیون لخوا څېړل شوې او ټولې له لاسه وتلې پانګې لا تر اوسه راټولې شوي نه دي او د افغانستان بانک، د کابل بانک قضیه د هغه ټولو موضوعاتو تر رسیدګۍ پورې له حقوقي او قانوني پلوه څېړي او تعقیبوي.
د کابل بانک د یو ونډه لرونکي په توګه د ښاغلي عبدالغفار داوي ګډون د دې قضیې له سترو مواردو څخه ګڼل کیږي. ښاغلی داوي د پورونو د نه ورکولو له امله په بند محکوم شوی دی. حال دا چې په ولسي جرکه کې د هلمند د خلکو استازي ښاغلی کریم اتل څو ځلې بانک ته مراجعه کړې او د ښاغلي داوي په قضیه باندې یې د خبرو کولو ټینګار درلوده.
له هغه ځایه چې د ښاغلي عبدالغفار داوي قضیه یوه حقوي قضیه ده او هغه په زندان کې شپې او ورځې تیروي، د افغانستان بانک د لوی ریاست سرپرست ښاغلی اجمل احمدي د ښاغلي داوي له مدافع وکیل او د افغانستان بانک حقوقي ټیم سره د یوې غونډې په تنظیم هوکړه کړې وه څو دا قضیه وڅېړي.
له بده مرغه، پرون سهار ښاغلي کریم اتل د افغانستان بانک ته راغلی ؤ او له کوم مخکیني خبر پرته یې ښاغلی عبدالغفار داوي هم له ځانه سره د افغانستان بانک د لوی ریاست د سرپرست ښاغلي اجمل احمدي دفتر ته راوستلای وو. ښاغلي اجمل احمدي له ښاغلي کریم اتل څخه وغوښتل څو له ښاغلي کریم اتل سره یوازې غونډه ترسره کړي او له ښاغلي داوي وغوښتل شو څو غونډه پریږدي چې د ښاغلي اجمل احمدي دا غوښتنه د ښاغلي کریم اتل له توند غبرګون سره مخ شوه.
دا په داسې حال کې ده چې ښاغلي عبدالغفار داوي بندي دی، د کابل بانک په تړاو د هغه قضیه په محکمو کې تر څېړنې لاندې ده او د ښاغلي اجمل احمدي دفتر ته له کوم مخکینۍ همغږۍ پرته راغلي ؤ.
د افغانستان بانک د قضیې له اړخونو څخه غوښتنه کوي څو د دې موضوع حقوقي او قانوني پروسه تعقیب کړي او د تصمیم نیولو په پرسه کې له نفوذه ډډه وکړي. د افغانستان بانک مشرتابه پلاوی د ملي شورا او ولسي جرګې ښاغلو غړو ته درناوی کوي او دا خبرتیا یوازې له خلکو او رسنیو سره د حقایقو او د بې بنسټه راپورونو د خپرولو د مخنیوۍ لپاره شریکوي څو د افغانستان خلک پوه شي چې یو شمېر اشخاص غواړي د کابل بانک په قضیه کې د تصمیم نیولو بهیر له خپل نفوذ لاندې راولي.
