د اکو د سوداګرۍ او پراختیا بانک (ETDB) د مدیره پلاوي د دوه نوي یمې غونډې جوړېدل
د اکو د سوداګرۍ او پراختیا بانک (ETDB) دوه نوي یمه غونډه د ۱۴۰۰ هجري لمریز کال د مرغومې میاشتې په ۷ نېټه په آنلاین ډول جوړه شوه. په دې غونډه کې د اکو سوداګرۍ او پراختیا بانک رئیس او د غړو هېوادونو (افغانستان، پاکستان، ترکیې، ایران، آذربایجان او قرغیزستان) د مدیره پلاوي غړو شتون درلود.
په یاده غونډه کې لومړی د مدیره پلاوي له لوري مخکینۍ صورت جلسه تصویب شوه او ورپسې د همدې بانک د ۲۰۲۲ زیږديز کال د بودیجې د تصویب او همدارنګه له اجنډا سره سم د دې بانک په ځينو پالیسیو او مقرراتو کې د بدلونونو(تعدیلاتو) د راوستلو په تړاو خبرې اترې ترسره او لازمې پرېکړې يې وشویې.
د یادونې وړ ده چې دغه بانک په سيمه کې د سوداګرۍ د پراختیا لپاره د مالي او اعتباري آسانتیاوو د رامنځته کولو، دودولو او وړاندې کولو او همدارنګه د اکو سازمان تر څار لاندې د غړو هېوادونو د اقتصادي پراختیا د چټکتیا په موخه پرانیستل شوی دی او مرکز يې د ترکيې په استانبول کې دی.
افغانستان په ۲۰۱۴ زیږديز کال کې د دې بانک غړیتوب ترلاسه کړی دی او په غونډو کې يې په منظم ډول ګډون کوي.
د افغانستان بانک تل هڅه کړې ده، څو د خپلو اړیکو د تامینولو او ښه والي لپاره د نړیوالو او سیمه ایزو مالي سازمانونو سره فعاله ونډه ولري او د مالي او بانکي آسانتیاوو په برخه کې تر ټولو ښه او ارزښتناکه رول ولوبوي.
