د افغانستان بانک له لوري د رسنیو استازو ته ښوونیز ورکشاپ جوړ شو
کابل، ۱۳۹۸ د غبرګولي ۲۸ مه – د افغانستان بانک له لوري د رسنیو استازو ته د دغه بانک د موخو، دندو او کلي سیاستونو په اړه یو ورځنی ښوونیز ورکشاپ جوړ شو.
د دې ورکشاپ په پیل کې د افغانستان بانک لوی رئیس ښاغلي خلیل صدیق د بیان آزادي، معلوماتو ته لاسرسی او د رسنیو رول د اقتصادی وضعیت په ښه والي، روڼتیا او ټولنیز عدالت په رامنځته کولو کې د خورا اهمیت وړ په ګوته کړ او د رسنیو د کارکوونکو لپاره یې د دې ډول ورکشاپونو جوړول ګټور یاد کړل.
ښاغلي صدیق زیاته کړه چې د افغانستان بانک له رسنیو سره ښه همکار پاتې شوی چې له دوی سره یې د هر ډول معلوماتو په شریکولو کې درېغ نه دی کړی او په دې برخه کې یې د افغانستان بانک سره د رسنیو له دوامدارو همکاریو هم مننه وکړه.
ورپسې د افغانستان بانک د پولي سیاست د عمومي آمریت مرستیال ښاغلي احمد خالد معراج په هېواد کې د پولي سیاست د تطبیق، په کور د ننه د بیو د ثبات د تامین او ساتنې، د هېواد اقتصادي وضعیت ته په کتو سره د پیسو د وړاندې کولو په مدیریت، کنټرول او همدارنګه د مبادلې د نرخ په اړه خبرې وکړې او په دې اړه یې هر اړخیز معلومات وړاندې کړل.
په دغه ښوونیز ورکشاپ کې د افغانستان بانک د مالي چارو د عمومي آمریت مرستیال ښاغلي سید محسن سادات پر بانکونو او مالي موسسو د نظارت (څار) یو پریزنټیشن وړاندې کړ چې په بانکونو کې د درجه بندۍ په تړاو یې د پانګو د کفایت د داراییو د کیفیت (څرنګوالي)، د ګټې د مدیریت او سیالیت په اړه ګډون کوونکو ته معلومات ورکړل.
د دې ورکشاپ په بله برخه کې د افغانستان بانک د مالي خدمتونو د پراختیا د عمومي آمریت مرستیال ښاغلي عبدالمتین غفوري د افغانستان بانک په اډانه کې د دې آمریت د جوړیدنې، موخو، دندو او مسئولیتونو په اړه معلومات ورکړل.
د نوموړي په خبره په مصونه، آسانه او دوامداره توګه مالي او بانکي خدمتونو او محصولاتو ته د خلکو پراخ لاسرسی د دې آمریت دندې دي چې د اقتصادي پرمختګ رامنځته کېدلو، د عوایدو د ناانډولۍ د له منځه وړلو او د غربت د کچې راټیټول یې موخې دي.
د دې ورکشاپ په پای کې د افغانستان بانک دویم مرستیال ښاغلي محمد قسیم رحیمي د غونډې جمع بندي وکړه چې د افغانستان بانک له لوري یې د رسنیو سره په لا همکارۍ یې ټينګار وکړ او د ګډونوالو رسنیو له استازو یې مننه وکړه چې په دې ښوونیز ورکشاپ کې یې ګډون کړی وو.
د دغه ورکشاپ په وروستۍ برخه کې د ګډون کوونکو پوښتنو ته ځوابونه وویل شول او ورته تصدیق پاڼې ووېشل شوې.
