د افغانستان بانک؛ د افغانستان برېښنا شرکت او د سوداګریزو بانکونو له استازو سره ګډه غونډه تر سره کړه
۱۴۰۰ د سلواغې ۱۸ مه – د افغانستان بانک د لومړي مرستیال ښاغلي نوراحمد آغا پر مشرۍ د افغانستان برېښنا شرکت له مسئولینو او د سوداګریزو بانکونو له استازو سره غونډه جوړه شوه.
په دې غونډه کې د سوداګریزو بانکونو لخوا د افغانستان د برېښنا شرکت د پیسو د لېږد او اړینو آسانتیاوو د رامنځته کولو په اړه بحث او د نظرونو تبادله تر سره شوه.
په دې غونډه کې د افغانستان بانک لومړي مرستیال ښاغلي نوراحمد آغا یادونه وکړه چې د افغانستان بانک د قوانینو او مقرراتو په رڼا کې د هر ډول همکارۍ لپاره ژمن دی او له سوداګریزو بانکونو هم غواړي چې په دې برخه کې د افغانستان برېښنا شرکت سره همکاري وکړي.
په یاده غونډه کې د افغانستان برېښنا شرکت مسوولینو یادونه وکړه چې دوی د درنو هېوادوالو لپاره د برېښنا رسونې په برخه کې د لا زیاتو خدمتونو وړاندې کولو ته ژمن دي او هیله یې وښوده چې په بانکي برخو کې به هم اړینې آسانتیاوې رامنځته شي.
باید وویل شي چې په دې غونډه کې د سوداګریزو بانکونو استازو هم ژمنه وکړه چې په یاده برخه او د برېښنا شرکت سره به له پېرودونکو څخه د پیسو د را ټولولو او لېږدولو په برخه کې بشپړه مرسته او همکاري کوي.
