د افغانستان بانک د سرپرست پر مشرۍ د عزیزي بانک له رهبري پلاوي سره لیدنه
۱۴۰۰ د سلواغې ۱۳ مه – د افغانستان بانک د سرپرست ښاغلي عبدالقاهر ( حاجي ادريس) په مشرۍ د دې بانک مشرتابه پلاوي د عزيزي بانک له رهبرۍ سره ولیدل.
په دې لیدنه کې د عزیزي بانک پر فعالیتونو خلکو ته د دې بانک د خدمتونو پر وړاندې کولو کې د آسانتیاو په رامنځته کولو هر اړخیزې خبرې وشوې.
د افغانستان بانک سرپرست ښاغلي حاجي ادريس د هېواد په اقتصادي رغونه کې د بانکي نظام شتون د ډېر ارزښت وړ یاد کړ او د دې بانک له مشرتابه یې وغوښتل چې د خلکو لپاره د بانکي خدمتونو په وړاندې کولو کې اړینې آسانتیاوې رامنځته کړي.
د عزیزي بانک مشرتابه هم ژمنه وکړه چې د هېواد په ټولو برخو کې به د خلکو لپاره غوره بانکي خدمتونه وړاندې کوي او په دې برخه کې به اړینې آسانتیاوې رامنځته کړي.
باید وویل شي چې د افغانستان بانک د هېواد د مرکزي او پر سوداګریزو بانکونو د څارونکي بانک په توګه تل هڅه کړې ده چې د درنو هېوادوالو لپاره غوره بانکي آسانتیاوې برابرې کړي.
