د افغانستان بانک سرپرست رئیس په کابل کې د ایران له سفیر سره ولیدل
۱۴۴۵ کال د شوال المکرم ۱۵ مه - د افغانستان بانک سرپرست رئیس ښاغلي هدایت الله بدري په کابل کې د ایران هېواد له سفیر ښاغلي حسن کاظمي قمي سره ولیدل او د دواړو هېوادونو د سوداګریزو او بانکي همکاریو پر پراختیا یې خبرې وکړې.
په دې لیدنه کې د افغانستان بانک د ټولو سرپرست رئیس ښاغلي هدایت الله بدري د هېوادونو ترمنځ د سوداګریزو او بانکي اړیکو پراختیا د ارزښت وړ یاده کړه او په دې برخه کې یې د افغانستان بانک له اړخه د قوانینو او مقرراتو په رڼا کې د پوره همکارۍ ژمنه وکړه.
نوموړي زیاته کړه د هېوادونو تر منځ د غوره بانکي اړیکو شتون د سوداګرو لپاره اړینې آسانتیاوې رامنځته کوي او د افغانستان بانک ژمن دی چې په هېواد کې پر نړیوالو معیارونو د برابرو بانکي خدمتونو د وړاندې کولو لپاره زمینه برابره کړي.
باید وویل شي چې په یاده غونډه کې د افغانستان بانک د ریاست د دفتر لوی آمر ښاغلي صدیق الله خالد، د بانکي څارنې لوی آمر ښاغلي عبدالرحمن قانت، د بازار د عملیاتو لوی آمر ښاغلی محمد عباس سامح، د بانکي څارنې د لوی آمریت مرستیال ښاغلي احسان الله منصور او د ایران هېواد له سفیر سره مل پلاوي ګډون درلود.
