د افغانستان بانک له افغان پست شرکت سره د مرستې ژمنه وکړه
کابل، د ۱۳۹۸ کال د سلواغې ۱۶ مه – د افغانستان بانک سرپرست او لومړي مرستیال ښاغلي وحدالله نوشېر د افغان پست شرکت له استازو سره د مالي خدمتونو او عوایدو د راټولونې په برخه کې د آسانتیاوو د رامنځته کولو په اړه لیدنه وکړه.
په یاده لیدنه کې چې د افغانستان بانک د عالي شورا په تالار کې جوړه شوې وه، د افغانستان بانک سرپرست او لومړي مرستیال د افغان پست شرکت د اړوندو چارو په اړه د دغه شرکت له مسئولینو سره خبرې وکړې او له یاد شرکت سره یې د هر ډول همکارۍ ژمنه وکړه.
ښاغلي نوشېر وویل، د افغانستان بانک ژمن دی چې د هېوادوالو لپاره د مالي خدمتونو او عوایدو راټولونې په برخه کې پراخې آسانتیاوې رامنځته کړي.
د دې لیدنې په ترڅ د افغان پست شرکت رئیس ښاغلي احمد وحید ویس د مالي خدمتونو او عوایدو د راټولونې په برخه کې له یو شمېر ستونزو یادونه وکړه او هیله یې وښوده چې د افغانستان بانک به یې یادو ستونزو ته د رسېدنې په برخه کې مرسته وکړي.
باید وویل شي چې د افغانستان بانک هڅه کوي چې د عوایدو راټولونې او مالي خدمتونو په برخه کې د هېوادوالو د هوساینې لپاره پراخې آسانتیاوې رامنځته کړي.
