د ختیځ زون چارواکو له خوا د افغانۍ د کارونې او اسعارو د مخنیوي په موخه هڅې
کابل ۱۳۹۸ کال، د لړم ۲۸ مه، د افغانستان بانک د افغانۍ د کارونې د طرحې او د اسعارو د مخنیوي په موخه د هېواد په کچه له بېلا بېلا ادارو سره غونډې وکړې چې په پایله کې د ختیځ زون، چیرته چې د افغانۍ د کارونې کمپاین ته ډيره اړتیا لېدل کېږي، چارواکو وکولای شول، چې په دې اړه د افغانۍ د کارونې د همغږۍ غونډه جوړه کړي.
د افغانستان بانک له چارواکو سره له لیدنې وروسته پرله پسې ختیځ زون له د افغانستان بانک سره د دې ملي پروسې د پلي کولو او د اسعارو د مخنیوي په موخه خپله همکاري څرګنده کړه او په ننګرهار ولایت کې د لړم په ۲۷مه - د ختیځو ولایتونو د والیانو، ولایتي شورا رئیسانو او غړو او د نورو اړونده مسؤلینو ترمنځ په همغږۍ سره د افغانۍ د کارونې او د اسعارو د مخنیوي په موخه د اقداماتو د ترسره کولو لپاره د همغږۍ غونډه ترسره شوه.
په دې غونډه کې د ختیځ زون اړوندو ننګرهار، لغمان او کنړ ولایتونو والیانو له خوا ښاروالانو، د انحصاراتو ادارې چارواکو، اصنافو، صرافانو، سوداګرو، ترانسپورټ او نورو اړوندو اداراتو ته لارښوونه وشوه چې د ولایتي چارواکو د پرېکړې له مخې پخپلو برخو کې د افغانیو رواجولو او کارونې په موخه لازم اقدامات پیل کړي.
د ننګرهار ولایت والي شاه محمود میاخیل د زون په کچه د اړوندو اداراتو د همغږۍ په ټینګار سره وویل چې ورځ تر بلې به د افغانۍ د کارونې پروسې ته زور ورکړي او تدریجې توګه به په دې اړه اساسي ګامونه پورته شي.
پاتې دې نه وي چې د ننګرهار والي تر دې وړاندې مسئولينو او بېلابېلو قشرونو سره هم د افغانيو بشپړ چلند په موخه ناستې کړې دي او تېره ورځ یې په ننګرهار پوهنتون کې د افغانيو د کارونې په موخه په علمي سمینار کې د افغانۍ په کارونې ټینګار وکړ.
په دې غونډه کې ننګرهار والي شاه محمود میاخېل، د لغمان والي محمد آصف ننګ، د کونړ والي عبدالستار میرزکوال سربېره د دې ولایتونو مرستیالانو د ولایتي شورا غړو، ښاروال، سوداګرو، د اقتصاد پوهنځي استادانو او د یوشمیر نورو اړوندو اداراتو کارکوونکو ګډون کړی وو.
