د دولتي صکوکو د طرحه کولو لومړنی ورکشاپ
کابل، ۱۳۹۸ د مرغومې ۱۷ ـ د افغانستان بانک، د عدلیې وزارت، د بانکونو د ټولنې، سوداګریزو بانکونو او د صرافانو د ټولنې د استازو په ګډون د دولتي صکوکو د طرحه کولو لومړنی ورکشاپ جوړ کړ.
په پیل کې د اسلامي بانکوالۍ او مالي خدمتونو لوی آمر ښاغلي دوکتور محمد یوسف سلیم د صکوکو په اړه هر اړخیزه پریزنټیشن وړاندې کړ او د دولتي صکوکو د طرحه کولو په اړه یې د ورکشاپ ګډون کوونکو ته معلومات ورکړل.
ورپسې د افغانستان بانک دویم مرستیال ښاغلي محمد قسیم رحیمي د موضوع په اړه خبرې وکړې او ټینګار یې وکړه چې عامه پوهاوۍ، د قانوني اډانې درلودل، د خلکو د باور تر لاسه کول او د دې خدمتونو پراختیا هغه ټکي دي چې باید د صکوکو په طرحه کولو کې ورته پاملرنه وشي.
د غونډې په اوږدو کې د دولتي صکوکو د طرحه کولو په اړه د ورکشاپ د ګډونوالو تر منځ نظرونه تبادله شول او په دې برخه کې یې ګټورې او ارزښتناکه مشورې وړاندې کړې چې کولای شو ورڅخه ګټوره استفاده وکړو.
د یادونې وړ ده چې په دې ورکشاپ کې د عدلیې وزارت مسلکي مرستیال، د بانکونو د ټولنې رئیس، د سوداګریزو بانکونو استازو، د صرافیو استازو او د افغانستان بانک یو شمېر آمرینو او مرستیالانو ګډون کړی وو.
د دې ورکشاپ په پای کې د افغانستان بانک سرپرست او لومړي مرستیال ښاغلي واحد الله نوشېر هم حضور پیدا کړ او د اسلامي بانکوالۍ په نظام کې یې د صکوکو د ارزښت په اړه خبرې وکړې او صکوک یې با ارزښته اسلامي پور پاڼې وګڼلې.
په دې ورکشاپ کې د عدلیې وزارت مسلکي مرستیال ښاغلي محمد قاسم حلیمي هم په دې موضوع باندې خبرې وکړې او د دولتي صکوکو لپاره د قانوني اډانې د جوړولو لپاره یې د هر ډول همکارۍ ژمنه وکړه.
