د کرونا ویروس د مخنیوي په اړه د افغانستان بانک د بېړنۍ کمېټې دویمه غونډه
کابل، د ۱۳۹۹ کال د وري ۳ مه – د کرونا ویروس د خپرېدو د مخنیوي او دغه راز د دې ویروس په اړه د اداري اصلاحاتو او ملکي خدمتونو د خپلواک کمېسیون د طرزالعمل په اړه د افغانستان بانک د بېړنۍ کمېټې دویمه غونډه جوړه شوه.
دا غونډه چې د افغانستان بانک د دویم مرستیال ښاغلي محمد قسیم رحیمي په مشرۍ جوړه شوې وه، د افغانستان بانک د بېړنۍ کمېټې په لومړنۍ غونډه کې اړوندو څانګو ته د سپارل شویو دندو په اړه راپور وړاندې شو.
په دې غونډه کې د افغانستان بانک دویم مرستیال د اړوندو څانګو له مسئولینو مننه وکړه چې ورسپارل شوې چارې په ښه ډول ترسره کړې دي.
باید وویل شي چې په دې غونډه کې د کرونا ویروس د مخنیوي په اړه د اداري اصلاحاتو او ملکي خدمتونو د خپلواک کمېسیون له لوري په جوړ شوي طرزالعمل هم خبرې وشوې او اړوندو څانګو ته دنده وسپارل شوه چې له یاد طرزالعمل سره سم اړوندې چارې برابرې او په اړه یې برابر شوی راپور راتلونکې غونډه کې وړاندې کړي.
د یادونې وړ ده چې د افغانستان بانک د خپلو کارکوونکو او مراجعینو لپاره د کرونا ویروس څخه د مخنیوي لپاره اړین تدبیرونه نیولي دي.
